Magar los abondos cambeos que ta sufriendo l’Universu DC desque James Gunn tomó’l mandu, hai dellos proyeutos que taben d’enantes y siguen alantre, pinta qu’intautos. Ún d’estos ye Joker: Folie à Deux, la segunda parte de la película de Todd Phillips na que Joaquín Phoenix versionaba’l Príncipe Payasu del Crime, y que tantu ésitu tuvo ente crítica y públicu. Como la película taba fuera de la continuidá principal de les películes, esta segunda parte va presentar una Harley Quinn nueva, que podemos esperar mui diferente de la encarnada por Magott Robbie, y l’actriz encargada de facelo ye la más famosa por cantante Lady Gaga.
Creada por Bruce Timm pa la serie d’animación de Batman de los noventa, Harley Quinn ye nesta, nos cómics y nes películes del Universu DC una siquiatra del Asilu Arkham qu’acaba namorándose del so paciente, y dende entós tienen una violenta rellación romántica hasta que, va unos años, rompieron dafechu con hasta tiros de per mediu. Esta versión nueva de la antiheroína, por embargu, abulta que va ser tan distinta de la orixinal como’l propiu Joker, pos definen la película como un musical y paez ser qu’ella va ser, como l’actriz, una cantante.
Va unes hores, Lady Gaga y Todd Phillips compartieron en redes la primer imaxe de la película na qu’ella sal faciendo’l papel, y que vos ponemos pa que la veáis darréu. Quédennos por saber les traces que va tener antroxada (bono, qu’esperamos que lo acabe tando a lo llargo de la película) pero yá podemos ver cómo ye l’aspeutu de Harleen Frances Quinzel primero de que’l Joker la lleve a la llocura.
