L’otru día contábemos (podéis velo calcando equí) que la industria del manga ta, nos últimos tiempos, enanchando enforma’l catálogu en llingües amenorgaes, con editoriales como Planeta, Norma y Panini sacando enforma más catálogu en Catalán, y Ooso mesmamente n’euskera.
Bien, pos paez que la fórmula ta saliendo bien, pos la llicencia nueva de Panini, l’adautación al manda de la serie d’animación Ladybug, va asoleyase siendo tamién billingüe, cola edición simultánea en castellanu y catalán. Va llevar por nome Miraculous: Las aventuras de Ladybug y Cat Noir na primera d’estes, y Prodigiosa: Les aventures de Ladybug i Gat Noir na segunda.
El manga, de Warita Koma y Tsuchida Riku, adauta la conocida serie francesa d’animación dixital que tien una superheroína franco-coreana y el so amigu como protagonistes, combatiendo’l crime xuntos pero al empar desconociendo les sos identidaes secretes.
De momentu salieron trés tomos en Xapón, y la edición de Panini estrénase en marzu.
