De guaḥe solía xugar a rol col mio hermanu. Agora pienso que los temes a los que xuguemos nun yeren los más afayaos p’aquella edá, pos n’acabando Primaria yá fora un detective que tentara de nun alloriar al atopar devoradores de cadabres, nos alredores d’una casona de Nueva Inlaterra, y tamién un demoñu pirómanu qu’acabó prendiendo-y fueu al institutu. Pero yeren hestories, non más qu’eso, y nunca nun me dio por aburiar l’institutu na realidá. O, polo menos, non más qu’a cualesquier otru rapaz.
Yá yendo a primeru d’ESO, quedé pa xugar con un amigu. Ilusionéme, porque sedría’l master per primer vegada: Esto ye, el narrador de la hestoria, y non el protagonista. Elixí un tema muy estremáu a lo que tenía avezao, pero que siempres m’apasionó: un xuegu de superhéroes, nel que’l xugador sedría un cruzáu amazcaráu, tentando de salvar el mundu de fuercies maliñoses. En preparando la aventura (bono, en realidá teníala preparada dende que merqué’l llibru, años enantes), punxi los playeros, garré’l llibru y los dados, y de la que taba despidiéndome de la familia llamaron per teléfonu:
“Oi, que mio ma nun me dexa salir. Diz qu’eso del rol ye mui peligrosu, y illegal. Perdona, vémonos en clas.”
Quedé ablucáu. Nun fui a entender cómo daquién podría creyer qu’axuntase alredor d’una mesa y maxinar una hestoria yera peligrosu, y munchu menos illegal. ¿Podía haber un crime ensin víctima dala? Resulta que, pocos años enantes, unos asesinos tiraren los dados pa decidir a quién matar. Llamáronlo xuegu de rol, y esa fue la imaxe que quedara na sociedá. Y pa mayor dislloque, los protagonistes de Compañeros xugaben a rol nun capítulu, lo que-yos forciaba a robar n’El Corte Inglés. Esta mala publicidá tamién se dio colos videoxuegos, anque llueu amenorgó al ver que les campañes nataliegues d’aquelles máquines diabóliques daben munches perres a les cadenes de televisión. Por suerte, munchos videoxuegos yeren de rol, y pue que l’ameyoramientu d’esta industria ayudara a que, adulces, esapaeciera tamién el refugu pa colos xuegos de mesa.
Tala triba de ataques nun ye nueva, nin muncho menos, pero nes democracies modernes resulta entovía más absurda. Como aquella cruzada que se dio nos Estaos Xuníos de los años cincuenta escontra’l cómic, que lu rellacionó col fascismu, el comunismu, la homosexualidá, la pederastia, los problemes siquiátricos y el crime en xeneral. Aburiaron cómics en públicu y obligaron a les editoriales a siguir un códigu perestrictu: Nun podíen apaecer criminales con clas, simpáticos o esitosos, nin muyeres sensuales, nin pantasmes o vampiros, nin drogues, nin sangre… ¡Nin siquiera un home y una muyer durmiendo na mesma cama! Como yera d’esperar énte tantes zancadielles, cuasi foi la fin del mediu, entovía acabante nacer. Por suerte, salió-yos la perra mal capada, y la fame de los autores produxo una esplosión de creatividá, na que héroes coloríos, monstruos radioactivos, goriles parllateros, estraterrestres de poderes estraños y dimensiones inconcebibles enllenaron les páxines, dando llugar a la llamada “Dómina Platiada del Cómic”. De nueves, como tantes vegaes a lo llargu la historia, demostróse que nun se puen poner portielles a la mar.
Pero los censores son necios, y nun arrenuncien a siguir dando guerra. Y nun me refiero, como se fai davezu, a considerar censura les protestes escontra obres o artistes nes redes sociales. Obviamente, ye parte esencial de la llibertá d’espresión quexase de lo que fai otru con ella, inclusive si esta consiste en facer boicós pa que la xente nun pague pola obra, yá seya pol conteníu, pola vida llicenciosa del artista, porque nun hai diversidá na obra, porque sí l’hai, o lo que-y pete a cada quién. Nun quiero con esto comparar, quede nidio, a quien acusa una obra de racista o machista del racista o machista al que-y molesta qu’una obra aboque los sos prexuicios. Nun son casos comparables, anque heba quien, nun ataque de puritanismu progresista, faiga de la crítica a la falta d’inclusión una xamuestra. Vienme a la cabeza esa ocasión na que pidíen diversidá racial n’El Señor de los Aniellos, una obra basada enforma na mitoloxía nórdica, y non que se diera visibilidá a la fantasía basada n’otres cultures. El xéneru de “espada y alma” (análogu de la espada y bruxería, nuna contorna africana) o’l nomáu wuxia (del que nos lleguen delles obres sonaes, como Tigre y Dragón) son exemplos bonos, porque la inclusión nun ye, y nun pue ser, asimilación na cultura hexemónica y atapamientu de la diversidá verdadera.
Pero, como diba diciendo, nun poemos llamar a eso censura, pos ye parte necesaria de la llibertá de espresión anque en delles ocasiones s’esmane y, nun hai que lo negar, tenga un aldéu a un xuiciu popular na plaza virtual, con un enxame de xente fadiao como tribunal. La censura de verdá, a la qu’hai que pertener mieu, ye esa na que l’Estáu se mete pel mediu, y entós entama de dicir qué se pue asoleyar y qué non. Nun ye daqué que pase tolos díes n’occidente, pero sí dacuando y, pa mio idea, más nestos años postreros. Una d’estes ocasiones, de va una década pero con muncha sonadía, foi cuando dellos países, como España o Inlaterra, vedaron la proyeición d’A Serbian Film, por apaecer nesta película una escena de pederastia. El neñu yera, por supuestu, un moñecu, y yera bien evidente que l’oxetivu de tala escena yera atemoriar dafechu al espectador, nunca escitalu. Nun dio más, nun pudieron echala. Pue abultanos que nun venía a cuentu, que yera asquerosa, o lo que fora, pero esi ye’l nuesu drechu, y naide ye a quitánoslo. L’Estáu nun ha decidir por nós y dictar qu’hai un crime ensin víctima, una obra que, polo qu’amuesa, tien peligrosidá social.
Apocayá surdió una polémica nueva, con un aldéu a esta última. Dende xunu, Corea del Sur nun permite que s’espublicen películes, manga o moñecos nes que personaxes menores d’edá (o que lo paezan) tenga rellaciones sexuales. Nun ye l’únicu país, pero foi l’últimu en decidilo. Puen encarcelate fasta cinco años por mercar, vender, anunciar o compartir esta mena d’obres. ¿Y por qué solo si apaecen imáxenes, entrúgome yo, y non n’otros casos? ¿Ye acaso lo qu’empobina al delitu? ¿La novela de Les edaes de Lulú nun tien esi peligru social, pero un manga nel qu’una vampira centenaria con aspeutu de neña quier folgar col protagonista, sí? Habrán de vedar Entrevista col vampiru tamién, entós. Amedráname abondo que, al apaecer esta noticia, tuiteros a esgaya escomenzaron a acusar, a quienes defendíen la llibertá de cuntar cualesquier hestoria, d’andar cascándosela con dibuxos animaos y escudase na defensa de drechos pa siguir faciéndolo. Un ad hominem espavoriante, nel que t’acusen a lo menos de pedófilu, y qu’amuesa que la llinia ente la crítica a la obra y l’aplausu a la censura tampoco nun tan mui lloñe. Personalmente, nunca nun m’interesó esa clas d’hestories, pero nun creyo que tenga nada que ver la llectura col deséu, y en munches ocasiones, tampoco’l deséu col acabamientu. Sí lleí una vez un manga del xéneru harem (esto ye, nel qu’un mozu ye medio acosáu por varies moces), nel que les pretendientes yeren, ente otres, una centaura apetonada, una mocina fecha de babaya y una arpía a la que-y costaba muncho poner güevos, y asina lo amosaben los sos ximíos. Lleíalu porque me facía gracia l’esparate, pero pel momentu nun me vieno rixu dalu al mirar pa una pita.
Agora xulguen a un cómicu n’España por bromiar en Twitter. Polos comentarios, abúltame que lo más molesto de la chancia nun ye que trate de discapacitaos, sinon qu’amuesa qu’estes persones tamién tienen vida sexual. El twit pue facenos gracia o non, sicasí, ta bien que se fale d’ello. Pero la fiscalía pide prisión. Y eso nun fai nenguna gracia.
