L’Asociación Internacional d’Esconxuradores (sí, sí esiste cosa tala) denuncia públicamente que la última película protagonizada por Russell Crowe, The Pope’s Exorcist, ye ofensiva por un númberu importante de razones; porque nun espeya como foi en verdá la vida de Gabriel Amorth, el verdaderu esconxurador de la diócesis de Roma qu’interpreta, pos se basa con demasiada llibertá nes sos memories; porque distorsiona y falsia lo que se vive nun esconxuramientu real, talamente como s’echa según les direutives de la Ilesia Católica; porque nun tien en cuenta’l sufrimientu de les víctimes de los demoños, convirtiendo les posesiones nun espectáculu de solombres y soníos fuertes pa provocar emociones fuertes y dañibles; por xugar a comparar les fuercies del mal col poder eclesiásticu, presentando un Papa poco fiable; y , en xeneral, por tratar un tema tan delicáu y relevante con mui poca fidelidá.
L’Asociación Internacional d’Esconxuradores fundáronla seis sacerdotes en 1993, siendo’l padre Amorth ún d’ellos. Anque la noticia s’asoleya agora, ye en marzu cuando sacaron el comunicáu, namás vieron l’avance (que podéis ver vós tamién calcando equí), conque ye dable que saquen otru agora que la película yá ta estrenada.
The Pope’s Exorcist ye una película d’horror que sal güei en cines nos más de los países, dirixida por Julius Avery (Samaritan) y, como dicíemos, con Russel Crow nel papel del padre Amorth, que tenía echao, según paez ser, más de cien mil esconxuramientos.
