Orpheus Ediciones Clandestinas, Pez de Plata, Duermevela Ediciones y la recién creada Quanta Media van aconceyar nuna de les meses de l’AsturCon, l’alcuentru de fantasía asturiana qu’esti añu se celebra los díes dos y trés d’avientu (sábadu y domingu) nel Antiguu Institutu Xovellanos de Xixón.
Na mesa En busca’l manuscritu perdíu, que la organización de l’AsturCon acaba d’anunciar en redes, les editoriales van falar de la lliteratura fantástica, de ficción especulativa y horror dende’l so puntu de vista, sobre qué ye lo que busquen nun manuscritu y nel so autor, de cómo funcionen les coses detrás del telón, de los sos secretos y del mundu editorial en xeneral. La mesa va tar moderada pola renomada autora Pilar Sánchez Vicente, y ye la segunda organizada pa la mañana del sábadu. Asina, diría xusto depués de la mesa sobre intelixencia artificial, La rebelión de les máquines (de la que yá vos falamos equí), y cola que s’inaugura l’alcuentru.
Esta va ser la segunda AsturCon d’esta nueva etapa, tres celebrase’l primer alcuentru l’añu pasáu, con gran ésitu, na Llaboral Centru d’Arte.