L’AsturCon ye l’alcuentru añal ente autores, editoriales y llectores de fantasía asturiana, y esti 2023 celébrase nel Antiguu Institutu Xovellanos los próximos díes dos y trés d’avientu. La organización ta dando la información sobre les actividaes adulces, pa crear hype d’esi nes redes, pero yá sabemos que va ser dalgo más grande que l’AsturCon d’antaño, pos esta vegada va durar día y mediu.
Sobre les actividaes, y magar qu’hai otres como speed dates de pretendientes a autores con editoriales, o la entrega del Premiu Fontenebrosa a meyor novela de xéneru, l’AsturCon céntrase sobre manera nes “meses” nes que distintos autores alderiquen sobre un tema que tienen en común. Y ye una d’estes meses el primer anunciu que faen, una qu’amás trata un tema mui de moda: la intelixencia artificial.
En La rebelión de les máquines, que ye’l títulu que-y dan al alderique, l’ilustrador, escritor y “Lord Protector d’AsturCon” Xon de la Campa va moderar la mesa formada por José Manuel Uría (físicu y autor de La física del Universo Cinematográfico Marvel), Rodolfo Martínez (editor y autor perpremiáu d’abondes obres, ente les que destaquen les de ficción científica) y Pablo F. Iglesias (autor, editor y CEO de CyberBrainers y EliminamosContenido). Ente toos ellos, y con participación del públicu, van tratar esti tema qu’últimamente enciende pasiones. ¿Van quitar les intelixencies artificiales trabayu a los autores? ¿Qué nos espera d’equí a unos años?
L’AsturCon trai d’esta manera l’alderique, con voces espertes pero tamién la participación de quien desee facelo d’ente los asistentes.
