Rodolfo Martínez (Candás, 1965), renomáu autor de ciencia ficción y fantasía, anunció esta selmana que va asoleyar una segunda novela d’autoría propia sobre’l personaxe más conocíu de Robert E. Howard. Al igual que La canción de Belit, l’anterior obra de la mesma natura, va tar firmada por dambos dos, yá que Martínez garra parte de los testos de Howard pa usar como pegoyos de la hestoria. Mientres que la primera usa como principiu y final les dos partes del rellatu Queen of the Black Coast, enllenando’l güecu qu’había ente elles, esta, Bajo la enseña de la tigresa, va reciclar rellatos, sinopsis y borradores que’l texanu dexó pa prau pa completalos, xunciéndolos con una tabierna y les hestories que cuenten nella como filu conductor. La fecha prevista d’espublizamientu ye ochobre de 2023.
A Rodolfo Martínez conózselu sobre manera poles sos obres de ciencia ficción, tamién por obres de fantasía urbana y pastiches de Sherlock Holmes, pero Robert E. Howard ye ún de los sos referentes y tien realizao una xera tremenda pa traducir al castellanu una gran parte de la so estensa obra. Ganador d’un Premio Minotauro, un Premio Asturias de Novela y más Ignotus de los que se puen contar colos deos de les manes, anguaño preside una editorial na que, ente otres obres nueves, propies y d’otres autores, reedita gran parte de lo que tien fecho. Podéis visitar la páxina de Sportula y echar una güeyada al so catálogu calcando equí.
