Sabi, oh, príncipe, qu’ente los años nos que los océanos somorgaron Atlantis y les ciudaes rellucientes, y los años del alzamientu de los Fíos d’Aryas, hebo una edá non suañada na que reinos rellumantes s’estendíen pel mundu como’l mantu azul pente les estrelles.
Robert E. Howard creó nos rellatos de Conan un mundu enllenu de maravíes, caballeros, pirates, princeses, bruxos y horrores. Nun-y facía falta estudiar una época y ciñise a ella, pues na so fantasía cabíen toles hestories que quisiera cuntar. Amás, ye sabío que la mayoría los sos países taben llixeramente basaos nos reales, permitiendo-y saltar d’un ambiente a otru ensin esfuerciu. ¿Quies una hestoria nel antiguu Exiptu? Estixa ye’l to país. Si t’apetez una polis griega, atoparásla en Corintia. ¿Viquingos? En Nordheim tienes fasta xigantes de xelu. Y anque los continentes foren perdiferentes “enantes del cataclismu”, va doce mil años, nun ye complicao encaxar el mapa d’entós col actual. Y, claro, la entruga vien agora:
¿A qué andaben n’Asturies na Era Hiboria?
Pues sabéi que cultures a esgaya axuntábense nel nuesu país.
Al sur alcontrábase Zingara, correllatu d’España y Portugal. Los habitantes teníen orixe amestáu, siendo nun entamu shemites pero entemeciéndose con pictos y hiborios. La so economía yera principalmente campesina y marítima, el gobiernu una monarquía, y la relixón principal la mitraica (anque se permitíen otros cultos). Yeren un poco paxareros, la verdá, vistiendo seda de colorinos y dexando los bigotes perllargos, y prestaba-yos adornar muncho les armadures. Na época de les aventures de Conan taben, cómo non, en metá d’una guerra civil.
Mientres, al este, taba Aquilonia (Francia), d’orixe hiboriu y relixón mitraica. Yera l’imperiu más poderosu de la Tierra, una superpotencia económica y militar. Anque, eso sí, los aristócrates yeren unos faltosos, acutando terrén n’abondo pa cotos de caza privaos. Esto empobinaba a los plebeyos a colonizar otres tierres, pues nun teníen nin pa semar.
Pela contra, al oeste, atopábense les tribus pictes, qu’anque correspuenden a los celtes, más bien yeren como los indios de les películes de vaqueros. Cada tribu llamábase pol nome d’un animal montesín, teníen bruxos, mui mal xeniu y esgargolábente a la mínima. Si a eso-y xunces que dalgunos acabalgaben estegosaurios, meyor si nun te metíes p’allá.
Ah, y al norte, como anguaño, había costa, anque nun daba a la mar sinón a un gran llagu. Los monstruos que podíes atopar pehí aconseyen nun se bañar.
Bono, pero dibemos a qué hai n’Asturies, non na contorna. Y si’l mapa dexa clara una cosa ye qu’hai un llugar qu’al menos en parte nos correspuende: Ellí, ente´l ríu Prietu y el ríu Truenu allugábase la Provincia Llibre de Thandara. Acabante colonizar polos aquilonios, Thandara, anque parte l’imperiu, yera una provincia autónoma, y tamién una de les más peligroses de la Tierra. Pa protexese de los pictos cauna les cases construyíase como si fora una pequeña fortaleza, ónde nun podíes dormir tranquilu porque les tribus de la Pantera, l’Ocelote y el Caimán naguaben por recuperar lo que llexítimamente yera de so. Pol mesmu motivu, el mandu yera militar, gobernando un caudiellu eleutu (anque dicho asina paez una contradicción). Pa encima, la teunoloxía aquilonia nun los algamaba tan lloñe, y habíen defendese colos sos medios. Riríense de los primeros colonos americanos, los thandarianos.
Pa dar unos detallinos más, dicir qu’anque los aquilonios solíen tener nomes paecíos a los llatinos, munchos colonos yeren emigrantes del norte, polo que teníen más bien nomes xermánicos, y estos siempre s’acompañaben de “fíu de (nome’l padre)”, a mou d’apellíu. De la so llingua nun sabemos muncho, podemos suponer qu’un dialeutu norteñu del aquiloniu, pero tiense documentao que la bona rellación con Zingara influyía na fala d’otres tierres sureñes d’Aquilonia. Y ye lóxicu pensar qu’usaben pallabres pictes pa los seres y materiales autóctonos que nun conocieren d’enantes. Una ayalga pa un filólogu, de xuru.
Y, pa finar l’artículu, vamos echar una güeyadina al futuru:
Na guerra civil aquilonia qu’acabaría con Conan como rei, Thandara púnxose de parte d’esti. Poro, ente los títulos del rei Conan ún ye’l de Proteutor de les Baroníes de Westermarck y Thandara, lo que fai suponer que col so reináu vieno un cambéu na organización política de la provincia. Tres la muerte de Conan, Aquilonia siguió creciendo a costa de los países vecinos fasta que, quinientos años depués, la invasión picta destruyó l’imperiu.
Pero eso, como diz la película de Schwarzenegger, ye otra hestoria…
