Güei acaba d’escomenzar la campaña de micromecenalgu en Kickstarter (pues entrar calcando equí) pa la edición nueva de Gaslands, un xuegu de mesa nel que los xugadores controlen grupinos de vehículos armaos hasta los dientes, usando como figures cochecinos al estilu de Hot Wheels, y han competir por recursos, la propia sobrevivencia y, el gran premiu, un billete a Marte de namás dir.
Amás de tola información y les regles de la edición anterior, Gaslands: Repostado incluye tou tipu de material nuevo en cientu trenta páxines nueves: regles pa motos, tanques y camiononos, armes especiales y accesorios como manchas d’aceite y propulsores de nitro, asina como opciones a esgaya pa escenarios, condiciones ambientales, tripulación y campañes. La edición va ser en tapa dura y a toa color, hai abondos estres pa los mecenes que quieran aportar más.
HT Publishers ye una editorial avilesina creada en 2013 y qu’asoleya principalmente xuegos de rol. Podéis ver la so páxina y el catálogu de productos qu’ufre calcando equí.
