Lenovo Legio Go ye la nueva máquina portátil que va salir al mercáu, nuna fiebre nueva que ta surdiendo dende la Steam Deck. Esta, por si nun sabéis d’ella, ye una maquinina sacada por Steam, la plataforma de venta de videoxuegos, pa funcionar con cualesquiera de los xuegos que viende y que valga pa les especificaciones (esisten dellos modelos, que ronden ente los cuatrocientos y picu y los cuasi setecientos euros). Tamién salió, va poco, la Rog Ally de la taiwanesa ASUS, que furrula con Windows 11 y cuesta ochocientos euros, y anda tamién pehí la china AYANEO AIR Plus, y hasta Sony quier volver tres años ensin portátil con Sony Project Q, que permitiría xugar de manera remota a los xuegos que tienes instalaos na PlayStation 5.
Lenovo yá tenía otra maquinina, Legio Play, pero qu’al cabu y al cantu diba con Android, conque tenía l’accesu a los mesmos xuegos a los que podríes tener con un smartphone. Asina, esta sedría nel fondu como una Steam Deck, pero más grandona pa poder esfrutar más de los xuegos (con unapantalla d’ocho pulgaes) y colos mandos quitables y patina pa tenela de pie, de manera que sirviría a mou de Nintendo Switch. Amás, Windows Report especula con que la pantalla sedría táctil. Tovía nun sabemos la fecha de salida nin el preciu que va tener, pero ye de suponer que, talamente como se fixó nes otres pa ufrir un productu competitivu, va facer lo mesmo col preciu.
