Los términos d’usu de Netflix indiquen que les cuentes de distintos usuarios puen usales namás persones distintes del mesmu llar, anque nun ye raro qu’haya xente entrando per cuentes de terceros, o clientes de distintes cases que paguen l’abonu a paches (de fechu, Netflix cifra les persones que ven los sos conteníos “de papu” en nada menos que cien millones de persones). La canal de streaming lleva tiempu alvirtiendo qu’esto nun se pue facer según la so política, anque ensin tomar midida dala pa evitalo. Por embargu, paez ser que la cosa yá terminó pa siempre.
Según cuenta New York Post (podéis ver la noticia orixinal calcando equí) a finales de 2022 decidióse que la fecha última pa dexar de permitilo ye finales de marzu, y d’entós n’adelantre va ser preciso pagar un estra por cada cuenta fuera del llar. Tovía nun se sabe exautamente de qué cifra tamos falando, pero apúntase a cantidaes superiores a los trés euros.
Otru niciu de qu’esto nun tien marcha atrás ye la opción acabante d’apaecer de treslladar usuarios d’una cuenta a otra, pa que col cambéu nun se pierdan les preferencies y l’historial de los usuarios.
Esto, xuncío a toles últimes cancelaciones que se tán dando, suma polémica a la canal y les redes tán qu’arden. A ti, ¿qué te paez?
