La selmana pasada estrenaben dos películes con grandes espeutatives. Per un llau, la película nueva d’animación de Pixar, Elemental, la primera nunos cuantos años n’estrenase en cines. Per otru, la película nueva de DC, The Flash, y que por fin, tres d’unos cuantos años d’espera, trayía’l protagonismu a la versión del velocista interpretada por Ezra Miller (yá vista en Justice League).
Por embargu, agora sabemos que les dos grandes estrenes tán ingresando mui pembaxo de lo esperao, y de fechu, anque foron les dos películes que más recladaron la fin de selmana, tovía anda cerca d’elles Spider-Man: Across the Spider-Verse, magar llevar yá unes selmanes. El casu ye, ¿por qué estos fracasos?
Sobre Pixar, les más de les opiniones señalen que, tres trés películes de los estudios estrenaes direutamente en streaming, en Disney+ (Soul y Luca pola mor del andanciu, Red nun se sabe mui bien por qué), el públicu paez tar empezando a ver los sos productos como más propios de televisión que de cine, y por ello nun abulta tar dispuestu a pagar les entraes. Asina, sedría la propia estratexa de Disney la que taría dañando la imaxe de los estudios. Tamién hai otres opiniones qu’apunten a que Pixar ta enfocándose demasiao nel públicu adultu, les bones crítiques y “la cultura woke“, perdiendo esi toque especial que tenía pa coneutar colos neños. L’argumentu de la película paez quiciabes demasiáu simbólicu, pos ye una fantasía romántica sobre una inmigrante de fueu nun país de xente de tierra, agua y aire, lo que pue facer pensar qu’hai pelo menos dalgo de verdá nesti argumentu.
El casu ye que la película costó doscientos millones de dólares (ensin contar la publicidá) y de momentu recaldó poco más de cincuenta. Too pinta a que va tener unes perdes importantes.
No tocante a The Flash (tenemos l’avance sotituláu n’asturianu equí), l’universu DC va a tumbos dende va años, y solo agora tenemos la promesa de que con James Gunn al frente van empezar a tener una direición más definida. A ello amestáronse los escándalos de la vida privada y problemes llegales d’Ezra Miller, el protagonista, y nin siquiera qu’ún de los protagonistes seya’l Batman de Michael Keaton, de vuelta tres delles décades, paez espertar la señardá como pa pagar pola película. Que dalgún la anuncie como “la meyor película de superhéroes de tolos tiempos” viose como un casu tremendu de grandonismu, y el boca a boca ta desmintiéndolo rápido. A ello hai qu’amestar tamién dalguna polémica más, y ye que los cameos de versiones antigües de superhéroes fóronse-yos de les manes: Ente ellos apaez una recreación dixital de George Reeves como Superman, cuando too apunta a que (si nun lu asesinaron) foi nun poder safase d’esti papel lo que lu acabó llevando al suicidiu. Ensin herederos, DC decidió facer esta xugada ensin tener de pidir permisu a naide, lo que resulta bien poco ético.
Asina, la película costó más de doscientos millones de dólares (amás d’una campaña de publicidá mui potente), de los que tien recladao poco más de cientu cincuenta. Tien pinta de pelo menos consiguir nun tener perdes, pero darrera vienen les tamién cares Blue Beetle y Aquaman and the Lost Kingdom… Con tantu aturulle, y depués del fracasu de Black Adam y que The Flash pase ensin pena nin gloria, naide nun ve probable qu’estes trunfen.
Too pinta a que’l cine pol qu’apostaben les grandes productores ta en crisis. ¿Taremos quiciabes énte un cambiu de ciclu?
