Una noticia estupenda pa los millennials, y ye que la serie clásica de dibuxos animaos, Gargoyles, ta de camín a volvese una serie d’acción real. Bono, o eso ye lo que se quier dende Disney+, que nun sedría la primer vegada qu’un proyectu queda a mediu camín d’estrenase… Habrá que ser optimistes, ¿non? La verdá qu’hai razones pa ello, y ye que yá tienen dalgún nome sobre la mesa de quién va llevala a bon puertu: Fálase de Gary Dauberman (guionista de les películes de la moñeca asesina Annabelle) y nada menos que James Wan (director, ente otres munches, de les películes d’Aquaman).
Bono, igual sois demasiao mozos, o pueque demasiao vieyos, pa saber que ye Gargoyles. Foi una serie d’animación estrenada en 1994, y qu’anque namás duró trés temporaes quedó grabada nes alcordances de toa una xeneración. Quiciabes foi’l tonu, más adultu de lo que yera vezu (anque nun dexara de poder vese pa tolos públicos), pero’l casu ye que quedó pa la Historia. De fechu, va poco que salió una serie de cómics, estrenada pola editorial Dynamite, y que ta teniendo un ésitu importante pa ser esta una editorial indie.
De momentu nun sabemos más d’esti proyectu nuevu, pero vamos dexavos equí l’avance de los dibuxos clásicos pa que los recordéis con señardá los que los vistis y, los que non, quedéis ablucaos con esta hestoria de fantasía sobre unes gárgoles medievales qu’espierten nel Manhattan de finales del sieglu XX.
