Por si nun lo sabíeis, el clásicu xuegu de cartes de Wizards of the Coast, Magic: The Gathering, va sacar pal ventitrés de xunu una coleición basada n’El señor de los aniellos. Bien, pos yá tenemos dellos detalles sobre ella, y hai ún que ye ablucante.
En primer llugar, como yera previsible, qu’ente les cartes de creatures van tar personaxes como Frodo, Gandalf, Aragorn o Gollum. Tamién, como carta d’artefautu y como nun podía ser d’otra manera, va tar l’Aniellu Únicu. Pero lo que naide nun s’esperaba ye que va haber una versión esclusiva d’esta carta, con ribetes doraos y el testu en tengwar (el sistema d’escritura creáu por Tolkien), qu’aspira a ser la carta más cara de Magic de la historia, superando’l míticu Black Lotus. Pa que vos faigáis una idea, un exemplar d’esta carta, de la primer edición del xuegu (1993) y nun estáu impecable, llegó a vendese en 2021 por nada menos que 422.850 euros.
¿Y cómo pretenden consiguir superar cantidá tala? Pos el secretu ye que va imprentase namás una carta d’estes, y van metela al bon tuntún nuna caxa de The Lord of the Rings: Tales of Middle-earth Collector Booster. Va ser, daveres, un aniellu únicu nel mundu.
Hai, por supuestu, quien critica esta maniobra, considerando que ye otra más d’unes males práutiques pa convertir un xuegu de cartes nun productu d’especulación. Pero esi xuiciu dexámosvoslu a vós. Por si tenéis la suerte de que vos toque, pa que nun la entaméis cambiándola a un espabiláu, dexámosvos la imaxe de la carta en cuestión, asina como la d’una de les caxes nes que pues atopala.
