Cola “vuelta al cole”, munches son les editoriales que sacaron delles novedaes nesta seronda. Delles noveles, un poemariu y hasta un xuegu de rol. Falámosvos de toes elles nesti artículu sobre les principales novedaes d’esta seronda*.
Los Xardinos de la Lluna:
Los Xardinos de la Lluna ye, quiciabes, la novela más esperada del añu. Esti llibru que-y valió un segundu premiu Xosefa Xovellanos a Francisco Álvarez, ta acabante de llegar a les llibreríes. Trátase d’un llibru ambientáu n’Italia – quiciabes ún de los pocos, sinón l’únicu de tolos escritos n’asturianu – que mos lleva a vivir la vida de Daniele, el fíu d’un italianu y una asturiana que vive’l drama políticu de la italia del sieglu pasáu.
Autor: Francisco Álvarez
Editorial: Trabe
Preciu: 15€
Pues mercalu: equí.
El llar n’orde
Gonzalo G. Barreñada ye una revelación nes lletres asturianes. Entamó a asoleyar la so obra va unos pocos años pero cuenta yá nel so haber con un palmarés impresionante. El llar n’orde nun ye namás el tercer poemariu de Gonzalo G. Barreñada, sinón que ye tamién el llibru que-y valió’l Premiu Xuan María Acebal 2019.
Autor: Gonzalo G. Barreñada
Editorial: Trabe
Preciu: 13 €
Pues mercalu: equí.
Depués d’Ochobre
Dende que se presentare’l Crowdfunding el 85 aniversariu de la Revolución d’Ochobre en 2019 hasta que llegó a les llibreríes pasó cuasi un añu, pero Depués d’Ochobre, el primer xuegu de rol n’asturianu ta acabante de salir a les llibreríes del país. Nesti xuegu de rol, los xugadores encarnarán a un espía o axente secretu que deberá movese per una Asturies de los años 70 que forma parte de la URSS.
Autor: Nicolás Bardio, ilustraciones: Xon de la Campa
Editorial: Radagast
Preciu: 24,90 €
Pues mercalu: equí.
Nunn
Falar de novela histórica n’Asturies hasta va poco yera falar fundamentalmente de Xulio Arbesú. Sicasí, l’escritor Xandru Martino propónnos una novela histórica totalmente orixinal tanto pola trama como pola dómina na que ta asitiada. Nunn llévanos a l’Asturies del sieglu I na que la invasión de Roma ye una realidá. Les columnes d’invasores romanos avancen hacia un mundu condergáu a la muerte: el de los antiguos ástures que vivíen nel nuesu país.
Autor: Xandru Martino
Editorial: Delallama
Preciu: 20 €
Puede mercase: Equí
El silenciu invisible
José Ángel Gayol ye ensin dulda ún de los ensayistes más importantes de les lletres asturianes. L’añu pasáu sacare yá l’ensayu-diariu “En Primera Persona” y va unos años ganare’l premiu Máximo Fuertes Acevedo d’ensayu entamáu pola Conseyería de cultura con “Vértigu”. El silenciu invisible ye otru ensayu más que se suma a la so amplia tradición y que tamién-y valió un segundu Premiu Máximo Fuertes Acevedo d’ensayu. Trátase d’un llibru enforma innovador que va percorriendo una serie de cuadros perimportantes na historia del arte occidental.
Autor: José Ángel Gayol
Editorial: Trabe
Preciu: 20 €
Puede mercase: equí.
Na sienda’l destín
Otra novela que ta acabante salir del fornu, como quien diz, ye “Na sienda’l destín”, del escritor Nel Morán. Primero escribiere la novela pa rapazos “Tyan” (Premiu de Llectura pa rapazos de l’ALLA) y “Fabia” una novela de misteriu p’adultos. Esta novela cuenta la hestoria d’un rapaz d’araxales de ciudá que tien que trabayar como porteru. Trátase d’una novela social que fala de la constante llucha de clases na que los probes siempre lleven les de perder.
Autor: Nel Morán
Editorial: Trabe
Preciu: 14 €
Pue mercase: equí.
*Si yes una editorial y acabes de sacar un llibru o vas sacalu pronto, puedes contánoslo en redaicion@refuelgu.com
