Va yá bastantes años qu’ente les películes más taquilleres tán siempre unes cuantes chines, nun siendo raro que consigan inclusive’l primer puestu. Y ye que, anque equí (siendo sinceros) puean paecenos un poco rares, hai mil cuatrocientos millones de chinos que piensen distinto. Ye verdá que dacuando nos llega dalguna, y de fechu hubo una moda importante va un par de décades, con obres estrenaes nos cines como fueron Tigre y Dragón y La casa de las dagas voladoras (ponemos los títulos talamente como nos llegaron, en castellanu, porque poniéndolos en chinu nun va enterase naide de qué falamos). Tienen intentao entrar nel mercáu occidental unes cuantes vegaes, como foi col casu de La gran muralla, pero nun acaben de pillar el puntu al gustu nuestru, y al final les sos películes salen, con suerte, direutes pa plataformes de streaming (como pasó con The Wandering Earth). Por embargu, la verdá que qu’anguaño son películes qu’ensin problemes puen competir en presupuestu y calidá coles norteamericanes, y quiciabes habría que face-yos más casu pa apreciar tastos diferentes.
Asina, vamos adelantravos qué grandes películes de xéneru salen esti branu:
Per un llau tenemos Creation of the Gods I: Kigdom of the Storms (col títulu internacional, n’inglés), la que promete ser la primer parte d’una triloxía de fantasía épica (basada nunes noveles) y onde s’entemecen historia, mitoloxía, guerra y artes marciales al más puru estilu wuxia que recordaréis si vistis dalguna de les películes yá mentaes. Dexámosvos l’avance calcando equí y, embaxo de tolos resúmenes, el cartelu colos de les demás películes.
Tamién tenemos Snafu/Hidden Strike, una película cola que tien tola pinta que quieren enganchar tamién al públicu occidental, pos nella tenemos al famosu nel mundu enteru Jackie Chan col norteamericanu John Cena, que desque pasó de la llucha llibre al cine ta que nun para. La película preséntanos un futuru posapocalípticu con escasez de fontes d’enerxía, lo que la encuadraría na ficción científica, pero la verdá que paez too una escusa pa xugar cola química ente los dos actores y aseguranos una bona riestra d’hosties y tiros. Tenéis l’avance equí.
Mientres, en Hong Kong, onde siempre tuvieron más fuelgu pa facer lo que-yos dea la gana, y l’aición pura y dura y la xente malo son reis del cine dende va tiempu, tenemos The White Storm 3: Heaven or Hell, ter parte d’una saga bien popular y onde alcontramos policíes infiltraos, popes de la droga, tiros a esgaya y escorredures en coche que vien valíen pa facer una Fast & Furious. L’avance, calcando equí.
Y esto ye solo por mentar delles películes, les que tenemos más posibilidaes de ver (en cine hai poques posibilidaes, pero pueque en televisión o buscándose la vida allegalmente). Pero’l cine chinu piega cada añu con más fuercia, lleva pelo menos una década creciendo una barbaridá y, quiciabes dientro d’unos años ye lo más normal del mundu ver estes obres nel cine.
