Acaba un añu enllenu de grandes estrenes, pero ello tamién significa que vien otru cargáu de novedaes. ¿Cuáles? Vamos echar un repasín polo más llamadero no que ye’l cine de xéneru que va salir nos próximos meses. Nun cuenta téunicamente como iviernu, pero recordámosvos que podéis ver l’avance d’Avatar: The Way of Water, ¡sotituláu al asturianu!, calcando equí. Pero bono, el casu ye les películes d’iviernu. ¡Vamos p’allá!
M3GAN
El direutor James Wan (Saw, The Conjuring, Aquaman) trainos una película de mieu con una moñeca asesina como villana, anque ensin les típiques posesiones infernales porque nesta vegada trátase d’un xuguete d’última xeneración, dotada d’una intelixencia artificial estraordinaria. Por supuestu, como ye vezu na ciencia-ficción, la cosa nun va salir como esperaba la diseñadora y la moñeca pronto va volvese un peligru pa los ñeños y les families.
Sal yá en xineru, y podéis ver l’avance calcando equí.
Ant-Man and the Wasp: Quantumania
Tercer parte de los superhéroes más pequeñinos de Marvel, y na que trés xeneraciones d’héroes (los Ant-Man y Wasp actuales, los pasaos y la fía adolescente del primeru) van dedicase a esplorar el Reinu Cuánticu (el “microversu” nos cómics) del que yá pudimos ver dalgo na entrega anterior. Arriendes d’ello, tenemos como malu a Kang, “el próximu Thanos” del universu cinematográficu de Marvel, que yá debutó na serie de Loki pero nel que de xuru van afondar nesta película.
Estrénase en febreru, y podéis ver ún de los avances calcando equí.
Scream 6
Tres el rellanzamientu recién de la saga, diéronse bien de priesa pa sacar una continuación, que va centrase nos sobrevivientes de los personaxes presentaos na última película y dexando pa prau los orixinales sacante’l interpretáu por Courteney Cox, pos paez ser que nun foron a llegar a un alcuerdu económicu con Neve Campbell.
Supónse que la película s’estrena en marzu, pero tovía nun sacaron siquiera un avance.
Shazam! Fury of the Gods
La segunda parte de lla película del gran superhéroe de DC, Shazam, masque hasta va poco yera conocíu como Captain Marvel, pero al que cambiaron el nome por razones obvies. Nesta ocasión, la “Familia Shazam” (tolos rapazos cola capacidá de convertise en superhéroes adultos de poderes asemeyaos) van tener d’enfrentase a les fíes d’Atlas, interpretaes nada menos que por Helen Mirren, Lucy Liu y Rachel Zegler. Sal la segunda metá de marzu, a puntu de nun apaecer nesta llista, y tamién podéis l’avance equí.
Y nada, que prometemos facer un avance d’estos cada estación del añu, col procuru de qu’a la próxima vamos tener yá más de dalgún avance sotituláu como agora ye’l casu del d’Avatar.
