Toos víemos venir que, tomando unes dimensiones tremendes la guerra de plataformes de streaming, taba hinchándose una burbuya que tarde o temprano tenía d’esplotar. Milenta canales distintes, compitiendo en precios y faciendo series y películes cientomillonaries, nun yera dalgo caltenible. Yá taba siendo vezu ente los veceros pagar un mes d’una y un mes d’otra, porque pocos puen permitise’l lluxu de tar abonaos a cinco canales distintes. Y asina, nos últimos meses vamos informándovos de qu’estes deciden imitar estratexes de la televisión convencional (como sacar solo un capítulu a la selmana), reducir conteníu, xubir precios, meter opciones con anuncios, restrinxir l’usu de les cuentes… Cualesquier cosa pa consiguir sobrevivir.
Pos agora, nun solo un día, tenemos delles noticies nueves, pero non bones, sobre dos de les canales más importantes a nivel d’usuarios y repercusión: Netlfix y Disney+.
The Wall Street Journal publica (podéis ver la noticia orixinal calcando equí) que Netflix quier aumentar los precios nel momentu en qu’acabe la fuelga d’actores, lo que s’amestaría al enfadu monumental que provocó restrinxir les cuentes a un solu llar. Anguaño, los precios n’España tán en 5,49 € al mes pol plan con anuncios, 12,99 € pol estándar y 17,99 pol prémium (que permite cuatro dispositivos y tien calidá 4K). De momentu nun hai información d’a cuánto podríen subilos.
Per otru llau, Disney+ tamién va vixilar l’usu compartíu de cuentes, empezando per Canadá yá en menos d’un mes. Asina, anuncien qu’a partir del ún de payares van poder “llendar o vetar l’accesu al serviciu y/o tomar cualesquier otra midida permitida por esti alcuerdu”, refiriéndose a los términos del serviciu esos qu’aprobamos siempre ensin tener idea de qué ponen. Esto amás vien venceyao, como yá sabíemos dende va un par de meses, cola política d’amestar, al igual que Netflix, un plan de pagu más baratu pero nel que tamién van meter publicidá.
