Por Adrián Carbayales
Clarice:
La sicóloga de The Silence of the Lambs, Clarice Starling, consigue serie de televisión propia. Asítiase en mil novecientos noventa y trés, añu y picu dempués de los socesos de la película orixinal, y l’axente’l FBI andará a la cata d’otros asesinos y depredadores sexuales, al empar que nos revelen coses turbies del so pasáu. Eso sí, nun esperar ver a Hannibal Lecter pequí, porque paez ser que nun tienen los drechos pa que salga. Protagonízala Rebeca Breeds (The Originals, Pretty Little Liars) y estrénenla na canal CBS l’once de febreru. Anque entá nun tenemos fecha n’España, de xuru que nun tarda demasiao.
El traile, equí.
Tribes of Europe:
Serie alemaña dirixida al públicu mozo, que nos presenta un mundu posapocalípticu nel qu’Europa dixebró en milenta estaúcos tribales que gobiernen caudiellos. Nún d’ellos, trés hermanos ven cómo s’estrella una nave espacial y atopen ente los restos un estrañu cachivache lluminosu. Como suel pasar, ye ehí onde la cosa entama d’enguedeyase. Amestando teunoloxía futurista y sociedaes atrasaes dende una perspeutiva europea, la serie tien una estética pecuñar que pelo menos llama l’atención, habrá ver si la calidá la caltién. Sal en Netflix el diecinueve de febreru.
El traile, equí.
Superman & Lois
Al aviesu de lo que pasó nos cómics y nes películes, agora atopámonos con una serie nueva de Superman que remanez de la de la prima, Supergirl. Teniendo sío Lois y Clark secundarios perimportantes d’aquella serie, agora independícense y pasen a protagonizar una propia na que, amás d’a supervillanos, tendrán d’enfrentase al cargu nuevu de ser padres d’unos superximielgos. Una serie que se suma a les del llamáu Arrowversu (con The Flash, Legends of Tomorrow, Supergirl, Black Lightning y Batwoman), anque paez qu’en 2021 nun va haber el típicu crossover añal, yá que quieren refugase de que l’equipu d’una-y pegue’l coronavirus a los de les otres. Estrénenla en CW el ventitrés de febreru, y ye d’esperar que n’España la saque HBO como yá fai con Supergirl.
El traile, equí.
Tenku Shinpan / High-Rise Invasion:
Netflix adauta a serie d’animación el sonáu seinen d’horror y misteriu del mesmu nome, que finó va un par d’años con ventiún tomos asoleyaos. Trata d’una mocina, Yuri, que d’esmenu s’alluga nuna ciudá perrara, na que los rascacielos tán xuníos por pontes y la única forma segura de viaxar ye cruciando per ellos de teyáu en teyáu. Amás de que tien de buscar a so hermanu, resulta qu’hai pehí xente amazcarao que mira d’asesinala, polo que nun tien otra qu’esplorar aquel mundu mientres fux. Hai dicir que nun ye too aición y matancies de baldre y hai un fondu con ciertu mensax, pos los autores del manga queríen falar nél sobre’l suicidiu y facer ver a los llectores que piensen en matase qu’esa nunca nun ye la solución. Sal na plataforma en streaming el venticinco de febreru.
El traile, equí.
Punky Brewster:
Non, nun ye coña. Bono, el cartelu sí, que ye’l de la serie orixinal. Y la verdá que tampoco nun ye que tenga mui bona pinta. Pero llamadera sí que ye, nun me lo negar, y d’eso va l’artículu. L’actriz que nos ochenta facía d’aquella guaḥa paxarera con un playeru de cada color torna nel mesmu papel pa una serie nueva. Agora ye una madre de trés fíos a la que tropezar una güerfana-y recuerda d’ónde vien. Asina, enanta la familia afiándola, y ye de suponer qu’ello va trayer situaciones cómiques n’abondo. Pueque valga pa señardosos y neños que nun esixen por demás, pa otros… igual meyor ver otra cosa. Ah, bono, y sal Freddy Prinze Jr. Estrénenla tamién el venticinco de febreru en NBC, ensin fecha n’España pel momentu.
El traile, equí.
