Por Adrián Carbayales
The Watch
Los aficionaos a les noveles de Terry Pratchett tán de norabona, pos nun queda nada pa qu’estrenen la serie basada en Discworld, el so ciclu más sonáu y del que tien escrito más de cuarenta llibros. Parodiando los tópicos de les hestories de fantasía épica más conocíes, como El señor de los aniellos, la serie ta ambientada na gran ciudá-estáu d’Ankh-Morpork, la más diversa y cosmopolita del mundu-discu pol que tienen cuatro elefantes encima d’una tortuga escomanada. Veremos lo qu’asocede dende’l puntu vista la policía metropolitana, y va tener un toque importante de xéneru negru magar que salgan nanos, gólems, dragones y cuasi tolo que se t’ocurra. Hai ocho noveles colos axentes d’esta ciudá como protagonistes, asina que si tien ésitu hai hestories pa unes cuantes temporaes.
Estrénenla na BBC el trés de xineru, y anque nun anunciaron tovía qué canal va sacala n’España, de xuru que nun tardará muncho. Si quies ver el tráiler, tiéneslu equí.
Lupin
Munchos supimos del lladrón francés de guante blancu pel so nietu xaponés, y a les xeneraciones nueves toca-yos conocelu per aciu d’esti aficionáu a les sos aventures que lu iguala en talentu. Netflix estrena l’ocho de xineru una serie protagonizada por Omar Sy, el d’Intouchables (la película aquella del inmigrante y el paisanu en siella ruedes) que trai de vuelta, más o menos, el lladrón más nomáu de la lliteratura.
El tráiler, equí.
Wandavision
Disney Plus escomienza a estrenar les milenta series de Marvel que tien tresnaes pa enantar l’universu cinematográficu. La primera que vien va ser Wandavision, cola estraña pareya de Vengadores, la bruxa y el robó, como protagonistes (en castellán llamaráse más esplícitamente Bruja Escarlata y Visión, por aciu d’un problema de drechos). Nun tien traces de ser una serie de superhéroes cualesquiera que fixeren col moldu les demás, pos paez que, cola sida de que se descontrolen los poderes d’alteriar la realidá de la Bruxa Escarlata, va xugar col formatu y la evolución de les series de televisión a lo llargo la historia, arriendes de romper lo que suel llamase “la cuarta parede” (la que se supón que ta del llau la pantalla, y que “ruempe” cuando, por un poner, un personax fala colos espectadores).
Ye nidio que la serie ta coneutada coles películes de Marvel Studios, siendo mala de siguir si nun se ta al corriente d’elles, y ye bien probable que traya consecuencies pa les vinientes. ¿Daquién dixo Young Avengers?
Sal el quince de xineru en Disney Plus, y si t’interesa tienes el tráiler equí.
Walker (Texas Ranger)
Más d’ún recordará la serie aquella de Chuck Norris na que repartía galletes ente los malos nel papel d’un ranger de Texas. Como revilvar franquicies ye más llamaderu pal públicu que facer una hestoria nueva, y van escosando les idees del sieglu XX, abulta que yá nun hai personax que salve, nin siquiera esti. Jared Padalecki, acabante finar Supernatural, va protagonizar la vuelta’l vaqueru karateca, y como ye pa CW podemos suponer que tendrá un tonu más xuvenil que la versión anterior.
Sal el ventiún de xineru nos Estaos Xuníos, entá ensin fecha n’España, y pues ver un tráiler equí (anque muy curtín, d’esos que llamen teaser).
Fate: The Winx Saga
Pa quien no conoza los dibuxos animaos nos que se basa, podríemos dicir que la serie ye más o menos Sailor Moon con fades y estética dosmilera. Bono, dosmilera cuando la estrenaron, allá per 2004, qu’entovía siguen saliendo temporaes nueves. Agora Netflix saca una serie d’aición real, menos infantil y más orientada a xente mozo, con un tonu enforma más escuru de pol estilu de Shadowhunters.
Van estrenala el ventidós de xineru, y tamién tienes un teaser equí.
Resident Alien
Basada nuna serie de cómics de Peter Hogan y Steve Parkhouse, cúntanos la vida d’un estraterrestre que s’amaruta de médicu vulgar, magar qu’en secretu tien l’envís d’acabar con tola humanidá. Por embargu, va dir encariñándose col mundu a midida que pasen los díes, lo que-y producirá duldes esistenciales y-y fadrá entrugase si ha siguir cola misión que-y encomendaron. Protagonízala Alan Tudyk (Firefly, Rogue One) y tamién va salir Linda Hamilton (Sarah Connor nes películes de Terminator).
Estrénenla en Syfy el ventisiete de xineru, entovía nun sabemos cuándo n’España y si sedrá na mesma canal. El tráiler ta equí.
