Ta claro qu’esti nun foi un bon añu pa Hollywood, y nun falamos solo pola fuelga de guionistes y actores que dexó xelada la producción de la gran fábrica de películes. Y ye que, de tolos grandes blockbusters, si garramos les catorce películes nes que gastaron pelo menos la friolera de doscientos millones de dólares, namás una, Guardians of the Galaxy Vol. 3, tuvo ganancies clares (yá que, amás de lo que cuesta la película, hai qu’amestar la publicidá que se-y fai). Les entregues nueves d’Indiana Jones o de Mission: Impossible, la deceíta The Flash o The Marvels de, claro, Marvel, producen perdes nes compañes. Y nun ye una cosa que quede llendada a les franquicies, porque The Killers of the Flower Moon, la última de Scorsese, tampoco foi nada bien. Mientres, son películes un poco más barates (pente los cien y cientu cincuenta millones) les que se faen colos primeros puestos del podiu de 2023: Barbie, The Super Mario Bros. y Oppenheimer.
Per otru llau, hai otres cuantes películes que, magar nun ser tan cares, tamién se vuelven fracasos sonaos, o pelo menos consiguieron menos de lo que les cábales anunciaben d’elles: Dungeons & Dragons, The Little Mermaid, Elemental, Shazam!: Fury of the Gods, Blue Beetle… Resulta difícil numberales toes.
Como tenemos dicho nesti portal, les tendencies cinematográfiques paecen tar garrando un enclín hasta agora desconocíu y que nun resulta nada claro, nel que tienen gran ésitu coses de les que nun s’esperaba muncho y, xusto onde los estudios poníen más esperances y fuercies, son los proyectos que más deshinchen. Nun sabemos ánde nos lleva esto, pero de xuru que resulta interesante averigualo.
