Yá en xunetu de 2022 sorprendíen con dos estraños sets de moñecos: ún de Leonardo, cabezaleru de Teenage Mutant Ninja Turtles, con Eleven, la síquica de Stranger Things; otru de Hopper, el xérif d’esta serie, cola más macarra de les tortugues, Raphael. Nun teníen más que ver ente ellos que ser productos de los ochenta (o nin eso, porque Stranger Things yelo retrospectivamente) y paecía que la cosa diba quedar como una escentricidá más del mercáu pletóricu. Debieron tener, sicasí, ciertu ésitu, pos nun tardaron en salir otres dos pareyes: Dustin con Donatello y Lucas con Michelangelo. Si vos preguntáis porque nun tien caúna de les tortugues un color distinto, ye porque estos nun yeren cosa de los cómics orixinales, y asina son les versiones orixinales, contemporánees a los socesos de la serie.
El casu ye qu’agora la cosa va a más, porque les editoriales con llicencia pa editar les sos historietes, Dark Horse nel casu de Stranger Things y IDW nel de Teenage Mutant Ninja Turtles, únense pa contanos esti cruz cuasi impensable ente dos franquicies del entretenimientu tan distintes. Y ye que les Tortugues Ninja tán que nun paren, porque nos últimos años tiénense atopao con personaxes de toa mena como Batman, los Cazapantasmes, los Power Rangers o’l tovía non estrenáu enfrentamientu colos lluchadores de Street Fighter (contémosvoslo equí).
En xunetu va salir, entós, el primer númberu d’esta serie imposible, con guión de Cameron Chittok (Mapmakers) y dibuxu de Fero Pe (TMNJ), que diz querer basase nel estilu de los cómics orixinales de les Tortugues. Na historia, polo que sabemos hasta agora, los dos grupos van cruciase en Nueva York y dixebrase en dos, pa enfrentase a una amenaza d’otra dimensión y, de pasu, pa que veamos la química ente los personaxes, ente les que los autores destaquen la de Raphael con Eleven o la de Michelangelo con Max.
