Va tiempu que se ruxe que nada menos que WIT Studio (los encargaos de Spy X Family) taba tresnando una serie d’anime con dalgún personaxe de DC. Asina, los estudios de la gran franquicia taríen buscando, como lleven faciendo un tiempu, producir obres fuera de la continuidá de les películes, probando distintos mercaos y estilos p’aprovechar lo más posible les franquicies tan potentes que tienen. La cosa, por embargu, paez que va ser tovía más gorda de lo que s’esperaba.
Y ye que la serie va llamase Suicide Squad ISEKAI, lo qu’une dos conceutos nun entemez ensin precedentes. Per un llau, ye probable que conozáis el supergrupu Suicide Squad, los villanos de DC obligaos por medios mui poco éticos a facer d’héroes. Nesti casu, los protagonistes son la más nomada pareya de villanos de Batman: Joker y Harley Quinn. Per otru, “isekai” ye como se llama un xéneru mui de moda en Xapón estos últimos años, y que consiste en garrar persones normales y tresportales a mundos de fantasía medieval, a los que van vese forciaos a facese si quieren sobrevivir. Y asina, de sópitu, vamos ver cómo la pareya de criminales va tener d’enfrentase a cuélebres, güercos y homones d’otra dimensión, un plantegamientu nunca vistu enantes y, la verdá, nun esperábemos.
Los diseños de los personaxes (que, como podéis ver si vos fixáis en coses como la sorrisa del Joker, son bastante orixinales) encargáron-yoslos a Amano Akira (autora de Katekyō Hitman Reborn!) y Hosoda Naoto (Mirai Nikki), mientres que la hestoria la ideó Nagatsuki Tappei (l’escritor de les noveles llixeres de Re:Zero kara Hajimeru Isekai Seikatsu).
Paez ser que, llamentablemente, nun vamos ver la estrena nun tiempu (anque nun hai fecha confirmada), pero yá tenemos un avance (curtiu pero mui prestosu) que vos dexamos calcando equí y hasta una páxina web na que van dir informándonos de toles novedaes.
