Por Adrián Carbayales
Toos conocemos los monstruos de la Universal. El Drácula repeñáu con capa de cuellu altu; la criatura de Frankenstein, con cabeza cuadrada y torniellos en pescuezu; l’home llobu con hipertricosis, caniles y garfies. La compaña dio a los monstruos clásicos l’aspeutu col qu’entovía los maxinamos. Tamién, anque esto yá lo sepa menos xente, creó el primer universu cinematográficu en comuña, muncho primero de que Marvel los punxera de moda. House of Frankenstein (1944), House of Dracula (1945) y Abbott and Costello Meet Frankenstein (1948) axuntaben los trés monstruos yá mentaos, y na postrera fasta apaecía l’home invisible como convidáu especial. Bono, oyíase, que ver, lo que ye ver, nun se-y vía.
Poro, en viendo’l surdimientu del Universu Marvel y lo codalosu que resultaba, daquién na compaña tuvo la idea de remanecer el so universu d’horror. La verdá, nun tuvieron munchu tinu colos primeros tientos. Dracula Untold (2014) convertía’l rei de los vampiros nuna especie superhéroe nuna película empericotiada d’efeutos especiales, y nun la siguieron magar que la escena cabera prometía que diben facelo. Con The Mummy (2017) volvieron a poner el carru delantre los gües y inclusive enantes d’estrenala anunciaron que, nes vinientes, Bardem diba ser el monstruu Frankenstein, Johnny Depp l’home invisible y nun sé cuántes coses más. La película pudo tar bien, la villana yera interesante y tarrecible. Pero punxéron-y enfrente un Tom Cruise enfarrucáu, que paez ser qu’anduvo caciplando pa camudar el guión y chupar cámara, estrozando dafechu la superproducción. Da la impresión de que vas cambiando de canal y ves a cachos una película de mieu, a cachos una comedia d’un faltosu zancarrión que s’acompaña d’una moza que bien podría ser la so fía. Énte otru fracasu, Universal quedó ensin saber qué facer y acabó pasando’l problema a otru.
Asina, cedió’l cargu a la compaña productora Blumhouse, conocida por sacar, nos últimos años, abondes películes de mieu con sonadía, tales como The Purge (2013), Get Out (2017) o la nueva de Halloween (2018). El so primer proyeutu colos monstruos de la Universal foi The Invisible Man (2020) y, dau’l resultáu, esperemos qu’heba munchos más. Ye una pena que la estrenaren poco enantes del zarru los cines pol andanciu, y asina nun fora tolo codalosa qu’ameritaba.
Argumentu:
Cecilia (Elisabeth Moss) fux de la casona la so pareya, Adrian Griffin (Oliver Jackson-Cohen), un xeniu mundial de la óptica al empar qu’un home retorcíu, que la maltrata y la tien apavoriada. Y anque esti la escuerre metá la nueche, la muyer llogra ponese a salvu cola ayuda la so hermana (Harriet Dyer) y guarezse na casa d’un amigu policía (Aldis Hodge). Poco dempués, cuando entá nun ye nin a salir a la cai de lo acuruxada que ta, recibe la nueva de que Griffin morrió y dexó-y una barbaridá de dineru como heriedu. Paez que les coses escomiencen a di-y bien. Por embargu, ella siente una presencia siguiéndola, esclucándola y faciendo-y la vida imposible.
Crítica:
Alcontrámonos énte una película moderna que tien tolo bono del cine clásico. Axunta adré dambos dos mundos dende’l mesmísimu entamu, con una secuencia d’apertura na que la mar sirve como aquelles tarxetes coles qu’antaño amosaben los creitos, anque nestes los faigan con CGI. Y esta mestura col cine antiguu recuerre tola película, na que predomina una imaxe cuasi tricolor na que namás rescamplen los tonos naranxes sobre los buxos y les colores apagaes que faen de blancu y negru.
Pa enriba, la hestoria nun s’afita, como anguaño ye vezu, en grandes efeutos especiales; ye a crear una atmósfera na que nun tien de facer esfuerciu abondu pa consiguir desasoseganos. Basta-y con apuntar la cámara pa un llugar nel que nun hai nada, o enfocar a la muyer como si fóramos nós quienes la miren dafurto. Da la sensación de que, de nun ser pola sensibilidá moderna y l’apaición d’aparatos teunolóxicos, podríemos ensin dificultá tomar la película por una de la Yera d’Oru del cine d’horror. Y por embargu, convirtiéndola too esto nuna película de mieu a la vieya usanza, el fondu ye un tema totalmente universal ya intemporal vistu dende la perspeutiva del sieglu XXI. Como yá podrás albidrar pola sinopsis, de lo que fala daveres nun ye d´invisibilidá, sinón de la violencia de xéneru.
Tres de la “separación”, qu’en realidá ye una fuxida como la d’una muyer secuestrada, esta tien de recomponer la so vida, lo que nun-y dexen la inseguranza qu’arrastra y l’acosu que sufre. A lo llargo la hestoria vemos cómo la acecha la pantasma’l so pasáu, boicotiándola, aisllándola y faciendo que la vean como una histérica. L’analoxía colos monstruos reales y non siempres visibles ye tan nidia que nun abulta qu’esta reseña heba d’afondar más nella, y que ye meyor nun lo facer pa nun revelar xiros argumentales.
Quiciabes tolo dicho faiga creyer que tamos énte una película que nun ye pa toa triba de públicu, que resulte cinéfila por demás pa ver una tarde na que namás nos apetez entretenenos comiendo flaires y bebiendo cola. En casu talu, pidimos perdón, pos tampoco nun ye eso. El ritmu nun sufre por toa esta intensidá formal y dramática, y la película tamién funciona bien como blockbuster. La tensión va espoxigando fasta’l momentu en que-y toca arreventar, y entós tamién nos forne d’una bona ración de castañes y efeutos d’ordenador.
En resume, la nueva versión del home invisible paga muncho la pena, perfecha al empar que flairera, y ye a algamar de sobra l’altor de les películes a las que-yos debe respetu. De fechu, los que conozan les películes orixinales d’Universal sedrán a alvertir dalgún homenax n’argumentu, sintiendo esi gociu un poco faltosu que supón saber que-y pasa desapercibíu a quienes nun les vieren.
