Nuna entrevista recién, l’actor qu’interpretó al míticu maestru jedi Qui-Gon Jinn declaró que nun tien nengún interés en volver a la saga, y que nun va haber nenguna pondera del personaxe (pelo menos protagonizada por él). Y ye que s’espardieren bastantes rumores de que podía volver nuna serie propia, a cuenta de l’apaición breve como pantasma que fizo n’Obi-Wan Kenobi. Va tiempu yá que dixo que lo ficiera namás por respetu al personaxe, pa que nun tuvieren de poner otru intérprete, pero nesta entrevista postrera va más allá y critica duro’l rumbu que ta tomando la saga.
“Hai demasiaes ponderes de Star Wars. Pa mio idea tan diliéndolo, tán quitándo-y tol misteriu y la maxa d’una manera tremenda” diz l’actor. Y la verdá que nun son poques les producciones que tán saliendo desque Disney se fizo colos drechos. En malapenes ocho años tienen sacao una triloxía nueva, les películes de Rogue One y Solo, les series d’aición real The Mandalorian, The Book of Boba Fett, Obi-Wan Kenobi y Andor, series d’animación como Visions, Resistance o The Bad Batch… Y paez que la cosa namás acaba d’empezar; vien una serie d’Ahsoka, a puntu d’estrenase; otra sobre Lando; una, A Droid Story, sobre C3PO y R2D2; un thriller llamáu The Acolyte; otra sobre neños perdíos buscando’l so llar pela galaxa, llamada Skeleton Crew… Y nel cine, una triloxía nueva a cargu de Rian Johnson, y otra película na que ta trabayando Taika Waititi.
Que la saga ta siendo sobreesplotada ye evidente. ¿Acaba o va acabar siendo perxudicial? Eso dexámoslo pa vosotros.
