Hollywood básase en dos coses nos últimos años: Les perres y la señardá. Dambes son necesaries pa qu’una película salga a les sales de cine y sepamos yá de mano que va tener una bona cantidá de xente mirándola. Al final, los “blockbusters” son cada vuelta más eso: remakes de remakes de spin offs de coses que funcionaron nel pasáu… ¿Cómo nun lo intentar con Toy Story? Les sales de cine enllenáronse d’adultos pa dir a ver una película que ye pa neños y, si acasu, padres nostálxicos.
Dende’l puntu de vista d’una película de guaḥes, la verdá ye que cumple les espectatives: Hai humor, hai una trama cenciella, hai una hestoria de superación, de compañerismu…. un poco lo que se-yos suel dar a los neños con mayor o menor aciertu. La verdá ye que la innovación nun ta ente los ingredientes de la película y, pa cumplir l’oxetivu que tien (xugar cola señardá y pasar el ratu) tampoco fai falta muncha. Los malos son malos porque tienen armadures negres y, nel casu de los robots, porque recuerden un poco demasiao a los Cylons de Battlestar Galactica. Vese la influencia de títulos d’ordenador como No man’s sky nes primeres partes de la película y l’impautu d’otros como Alpha Centauri a lo llargo de los segundos momentos. Les escenes de tensión y combate paecen sacaes alternativamente de Star Wars y de Battlestar y bien d’escenes bien “xugables” dexen entrever que, quiciabes, vamos poder ver un títulu d’ordenador basáu en Lightyear si los resultaos de ventes son bonos. ¿Sedránlo?
Una polémica ridícula con un besu de muyeres
Pero quiciabes lo más llamadero de Lightyear nun ye la propia película en sigo mesma; sinón la polémica absurda que s’entamó alrodiu del besu ente dos de los personaxes secundarios del títulu. La superior de Lightyear cásase con una muyer, adopten fíos y bésense. Nun ye nin siquiera una cosa fundamental na película, nin ye que la película esplore esta trama o estos personaxes; sal ehí como una nota al pie de páxina ensin más. La película nun trata temátiques LGTB sinón que les enseña como un elementu tanxencial que ye difícil nun entender que ta ehí na vida de cualquier persona, hasta de la más relixosa, conservadora y retrógrada. Quiciabes contribuyó a da-y visibilidá a la película pero si daquién entró a ver Lightyear esperando una defensa del matrimoniu igualitariu o un tratar temes sobre la sexualidá, qu’espere sentáu o sentada porque nun ye nin de lloñe la tema principal de la película.
Delles coses llamaderes
Llamen l’atención otros asuntos a la hora d’analizar la película como, por casu, el poder de los militares nun mundu que, se supón, ye yá una “casa”. Les violaciones de les regles que fai Lightyear tienen castigu namás dientro de la xerarquía militar y en nengún momentu s’especifica qu’heba na colonia nengún tipu de gobiernu que nun seya un directoriu militar. Ye interesante cómo se mos presenta como un fechu “normal” el que’l gobiernu tea en manes de los militares y naide faiga absolutamente nada por protestar o intentar afitar un gobiernu civil. ¿Quiciabes una película fecha “al candor” del estáu d’alarma? ¿O quiciabes ye una normalización de les formes y los medios de la estrema derecha?
