Les grandes productores d’entretenimientu anden últimamente al debalu, y Disney, como la más destacada de toes, ye la que más paez nun saber per onde empobinase. No que ye la canal de streaming, la orde ye recortar conteníu, subir precios, nun sobreesplotar les franquicies más granibles y vender a otres canales les llicencies que lo son menos. El fracasu de crítica y públicu de Secret Invasion, que manden regrabar Daredevil: Born Again porque nun gusta a los directivos, o que la que diba ser una serie de Lando (el personaxe de Star Wars) vaya convertise agora en película, son delles muestres de que nun tienen claru’l camín a siguir.
Nes sales de cine, la cosa tampoco va bien. Hai nicios de que l’Universu Marvel yá da cascancia, como’l poco ésitu que ta teniendo l’acabante d’estrenar The Marvels. Lo mesmo coles adaptaciones a “acción real” (que más bien ye CGI) de los clásicos d’animación como la recién The Little Mermaid, que d’ésitu andó más bien regulera, y tamién son gordos los problemes que tán teniendo cola versión nueva de Snowhite ensin siquiera estrenala (de los que vos falemos equí). Y, mientres, de los proyectos de películes que diben sacar de Star Wars paez que toos van cayendo ún a ún. Énte un panorama tan desastrosu, y con Mattel y Nintendo llevándose los primeros puestos de les películes más recaldoses d’esti añu (con Barbie y Super Mario Bros.) Disney nun tien otro que reinventase, magar que Kevin Feige, responsable de Marvel, fai como que nun escucha cuándo-y pregunten pola crisis.
De momentu, como vos comentábemos l’otru día, toles películes de Marvel que diben pa 2024 queden pa 2025 (sacante Deadpool 3, que ye discutible si ye de Marvel porque continúa les de Fox). Al respective del arqueólogu más famosu de la ficción, Disney dexa claro al anunciar la estrena en streaming d’Indiana Jones and the Dial of Destiny, que ye dafechu “la última entrega” y Harrison Ford nun va volver a poner el sombreru. Tocántenes a l’animación, el codirector de Wish (película que s’estrena la selmana viniente), Chris Buck, comenta que se basaron na animación tradicional en dos dimensiones pa facela, y mesmamente les primeres pruebes yeren con esta técnica. Asina, paez que la productora intenta volver a les sos raíces.
D’esta manera, l’Imperiu Disney paez zarrar unes puertes, al empar qu’abrir otres que paecía que tenía escaecíes, masque en xeneral tampoco queda mui claro tovía cuála ye la dirección que quier siguir. Abulta que nun tienen muncha idea. Lo que sí ta claro ye que tamos entrando n’otra etapa distinta nel mundu del entretenimientu, marcada pol decayimientu del xéneru superheroicu y l’españu de la burbuya’l streaming.
