Tol mundu taba sollerte al Pokemon Presents del 26 de febreru: paecía que diba haber novedaes importantes pa los siguidores del universu Pokemon, ente otros motivos, porque el 27 de febreru la saga cumplió 25 años. Pero lo primero de too, dalgunos igual nun sabéis lo que son los Pokemon Presents. Los Pokemon presents son presentaciones nes que Nintendo fala de novedaes de xuegos de Pokemon, de merchandising o anime o otros formatos de la saga.
El Pokemon Presents del 26 de febreru nun defraudó y anunció non solo un xuegu, sinón dos.
Pokemon Diamante Brillante y Pokemon Perla relluciente
El primer anunciu foi un remake pol que munchos tábemos naguando: el remake del Pokemon Diamante y Pokemon Perla, orixinales de Nintendo DS, que va salir a lo cabero de 2021, pa la Nintendo Switch, colos nomes Pokemon Diamante Brillante y Pokemon Perla relluciente. Lo que creo que naide nun esperaba ye que’l diseñu nun se modernizara, al estilu, por exemplu, de Pokemon Espada y Pokemon Escudu. Pal remake decidieron, no que cinca al diseñu, caltener bastante l’estilu orixinal, asina foi nes imáxenes qu’enseñaron na presentación: magar que los personaxes y los escenarios tán en 3D, decatáronse por un diseñu de los personaxes chibi (por definilo de dalguna forma, con personaxes chaparretos y cabezones) al estilu orixinal.
Esto xeneró bastante enguedeyu, y dellos siguidores de la saga nun tardaron en quexase en delles RRSS y criticar esta decisión de Nintendo. Dellos llegaron a compararon el xuegu con títulos como el xuegu MySims (Nintendo DS) o colos moñecos Pinypon, con memes, y con munchu humor.
Hai qu’esperar a ver más imáxenes del xuegu, y tampoco paez una decisión desacertada, ya que’l xuegu sí que ta modernizáu, anque sía con un estilu tan particular.
Lleendes de Pokemon: Arceus
La sorpresa importante de la presentación foi un nuevu títulu pa la saga: Lleendes de Pokemon. Esti xuegu va salir a entamos de 2022, y polo que yá dixeron y enseñaron paez que va ser bastante anovador, con una mecánica de xuegu distinta a la habitual na mayor parte de la saga.
Nesti xuegu nuevu preséntennos, na provincia de Sinnoh (na mesma que se desendolquen Pokemon Diamante y Pokemon Perla), un mundu abiertu y nel que vamos consiguir y enfrentanos a los pokemon en tiempu real y non en turnos.
Magar na provincia na que se desendolca, vamos poder tener pokemon de distintes rexones (anque entá nun sabemos cuálos vamos poder tener), y eso yá nos queda claro colos trés iniciales que vamos tener nel xuegu, que son de distintes xeneraciones: Cyndaquil (segunda xeneración, Pokemon Plata y Pokemon Oru) como tipu fueu, Oshawott (quinta xeneración, Pokemon Negru y Pokemon Blancu) como tipu agua y Rowlet (séptima xeneración, Pokemon Sol y Pokemon Lluna) como tipu planta. El por qué escoyeron estos iniciales nun lo sabemos tovía, va tocanos esperar a tener más noticies y más información.
Tampoco sabemos por qué se llama Arceus, y qu’escueyan esti pokemon y non otru tampoco nos da nenguna pista clara. Pa los que nun lo sepáis, Arceus ye un pokemon de la rexón de Sinnoh, qu’apaez per primer vez nel Pokemon Diamante y Pokemon Perla. La historia de Pokemon cúntanos que ye’l primer pokemon de toos, el que crea too, y polo tanto ye una especie de dios. La so historia ye perinteresante, y lluchamos con él nel Pokemon Diamante y y Pokemon Perla, y como va salir el remake nun vamos facer más spoilers (anque siempre tenéis la opción de volver a cargar la Nintendo DS y xugar l’orixinal).
Y esto ye tolo que sabemos del nuevu xuegu, qu’esperemos que sía prestosu como los anteriores.
Y vós, ¿qué pensáis de los remakes y del xuegu nuevu? ¿Tenéis ganes de probar dalgún?
