L’autor morciniegu Andrés Fernández escribió, con namás diecisiete años, 1809, Cartes de la Revolución de Trubia, la novela orixinal n’asturianu que más vendió en 2022 en llibreríes como Cervantes. Nesta, que ye una novela epistolar, presentó un mundu ucrónicu nel que la guerra con Napoleón tuvo un resultáu inesperáu p’Asturies, ún que (ensin desvelavos nada) cambia la so historia pa siempre. Tamién, esi mesmu añu, ganó’l premiu Enriqueta González Rubín cola so segunda novela, 1929, ambientada nel mesmu mundu que presentó na primera y desendolcando les consecuencies de la diverxencia histórica que presentó nella.
Agora, Andrés Fernández cambia dafechu de rexistru pa presentanos una novela de fantasía épica nun mundu de fantasía que bien recuerda a Asturies, pero nel que cuélebres, xanes y otres creatures mitolóxiques tremen los montes y achisben a los homes. Nella, que bebe de los cantares de xesta medievales tanto como d’autores de la fantasía moderna (como son visibles les influyencies de J. R. R. Tolkien o Robert E. Howard), preséntanos a dos caballeros, don Suaro y don Roldán, qu’han enfrentase a grandes peligros col poder de les armes y el so amor.
Esta novela nueva ta basada nun relatu curtiu qu’escribió va años, Carminia, ta yá a la venta en llibreríes de toa Asturies, y tamién podéis comprala online na páxina de Radagast calcando equí. La portada, que vos dexamos equí embaxo, ye obra d’Ana Pereira.
