La distribuidora y productora Selecta Visión da accesu a partir de mañana, ventitrés d’abril, a una canal nueva de streaming, que tien tola pinta de ser una importantecompetidora de la que, hasta agora, yera la única especializada n’anime, Crunchyroll.
La plataforma, tanto con accesu en versión web como con app, promete que tol so conteníu va tar disponble en xaponés y castellanu, asina como parte d’ello “n’otres llingües oficiales del Estáu”. Y ye qu’ente’l catálogu tien series bien populares, de les que munches yá s’emitieron pelo menos en catalán. Cuenten, anque tovía nun se sabe muncho, que tamién tienen unes cuantes n’esukera.
Pero, ¿qué sabemos yá d’esti catálogu?
Selecta Visión ye una distribuidora importante, y por ello pue ufrir series como Naruto, Ranma 1/2, Mazinger Z, Slayers, Inuyasha, Shingeki no Kyojin, Kimetsu no Yaiba, My Hero Academy o Yu Yu Hakusho. No tocante a les películes, anuncien clásicos como Akira, asina como les de Naruto y les de Dragon Ball, anque ye llamadero, al respeutive, que d’esta postrera nun anuncien tamién la serie (ye dable que, de momentu, tengan dalgún contratu con otra canal que-yos impida sacala).
Y arriendes de too esto, tamién van tener disponible una seición de live actions, y una coles abertures y finales de les series pa esfrutar los cantarinos más clásicos.
L’accesu a la plataforma pue ser per aciu del alquiler de películes sueltes, o bien al traviés d’una cuota, que pue ser de 5,99 € (pa un solu dispositivu y ensin accesu a delles películes) o de 7,99 € (a dos dispositivos y con accesu a tol catálogu). Tamién esiste una ufierta de llanzamientu que permite l’accesu un añu enteru por namás 39,99 €.
Si quies saber más, dexámoste equí l’enllaz a la páxina.
