L’autora de superventes Jaleigh Johnson ye la encargada d’escribir una saga nueva de llibros ambientaos nos universos de Dungeons & Dragons, agora que la película los punxo de moda ente un públicu más xeneral. De fechu, va tar ambientada en Faerûn, al igual que la película. La primera d’estes noveles, que sal en marzu del añu viniente, ye The Fallbacks: Bound for Ruin, y va presentar un equipu de personaxes (como yá podríes aldovinar, The Fallbacks) que tien tola pinta de ser el que protagonice tamién les entregues siguientes: Tessalynde, una lladrona suañadora; Anson, un lluchador neciu; Cazrin, una maga autodidacta; Baldric, un clérigu que se ñega a venerar a un solu dios; Lark, un bardu qu’escuende’l so pasáu; y Uggie, un monstruu adoratible que los acompaña. Esti ye’l carismáticu grupu del que vamos lleer les aventures a partir d’agora.
Nesta primer obra, los personaxes tienen un oxetivu claru: recuperar un poderosu llibru de fechizos pol que paguen una bona recompensa. Pero les coses tuércense pa ellos cuando’l pagador muerre y, darréu, desapaecen asesín y recompensa, colo qu’ellos se vuelven los sospechosos principales. Esto, por supuestu, va provocar tensiones nel grupu acabante formar, y na adversidá va descubrise si valen pa ser aventureros y camaraes… o non. Ente les coses que comenten tocántenes al estilu, una especialmente llamadera ye que quieren dar un xiru “contemporáneu” a los arquetipos clásicos, cosa que va esperar a lleer el llibru pa saber exactamente a qué se refieren.
Jaleigh Johnson, que ye una autora superventes qu’empezó a facese popular trabayando en llibros de Dungeons & Dragons, ente los que s’alcuentra una precuela de la película. Sicasí, tamién tien escrito otres coses como una saga propia de llibros pa ñeños, World of Solace, o una novela qu’espande’l mundu de los videoxuegos d’Assassin’s Creed, The Golden City.
