El mieu a que los sustituyan intelixencies artificiales ye una de les razones poles que se tán dando les fuelgues d’actores y guionistes, pero va tiempu que se comenta que les productores tán esperimentando con estes precisamente pa tener bocetos de guiones, pa que nel momentu en que los guionistes vuelvan al tayu tengan yá una base pa les películes vinientes.
Tamién foi noticia, non va muncho (contámosvoslo equí) que Marvel usara imáxenes xeneraes por intelixencia artificial pa l’abertura de Secret Invasion, una serie con nada menos que doscientos millones de dólares de presupuestu.
Y, por si too esto fuera poco, agora tán espardiéndose per redes videos curtios convertíos por Rask AI, un programa que ye a doblar a cualesquier idioma coles voces orixinales. El trabayu d’actor de doblaxe cuerre asina un seriu peligru.
Por embargu, too esto pinta a que nun ye más que l’empiezu, y güei trayémosvos otra noticia al respeutive: Escomienza a usase la intelixencia artificial nos procesos de producción. Nun hai tovía muncha información detallada sobre cómo, pero’l casu ye que yá tan planiaes delles obres (tanto series como películes) per aciu d’esti procesu. Y una d’elles, la que pinta ser el mayor proyectu d’estes característiques, ye Brightburn 2.
Continuación d’aquella película de 2019 que xugaba cola historia de Superman pa facer una película de mieu (“¿qué pasaría si’l neñu que s’estrella na Tierra tuviera dalgo escuro dientro?”), poco sabemos d’esta segunda parte, pos guarden bien en secreto de qué va dir. Lo que sí sabemos agora ye que, como dicíemos, la producción va incluyir procesos por intelixencia artificial que, según dicen, “promueven la integración responsable de la tecnoloxía, respetando a los profesionales y a los fans“. Ye asina, un pasu más nel procesu de sustitución que paez tar invadiendo la industria cinematográfica, y, anque aseguren que lo que quieren ye ameyorar y complementar el trabayu humanu, paez que nun ta quedando nella un trabayador ensin mieu a qu’una máquina-y quite’l puestu.
