Una de les poques coses bones que tien la cuarentena – que dalguna tien – ye la de poder tener más tiempu y tranquilidá pa lleer en casa. Yá seya porque temporalmente nun tenemos que trabayar, porque podemos facelo dende casa y aforrar les hores de desplazamientu en coche o en tresporte públicu o porque, cenciellamente, les coses que facíemos peles tardes yá nun les podemos facer, la oportunidá de lleer ta ehí y nun podemos desaprovechala.

Por eso, nesti artículu trayémosvos una riesta de llibros n’asturianu que podéis lleer nesta cuarentena y polos que nun tenéis que pagar nada. Podéis entamar agora mesmo a lleelos.

Fecho na Cuarentena (Radagast)

El llibru de la cuarentena por escelencia, sacábalu Ediciones Radagast esta selmana. Atropa un conxuntu de 28 rellatos de los que 17 tán n’asturianu, 10 en castellán y 1 en gallegu-asturianu. Les temátiques son de lo más variao y hailos inéditos y premiaos, fechos por xente nuevo y por autores consargaos. El llibru ye de baldre y pue pidise en www.edicionesradagast.com, onde van mandávoslu per mail. O descargase equí.

Güelu Ismail (Trabe)

Güelu Ismail ye una de les xoyes que tán en llibre accesu esta cuarentena. Trátase d’una de les poques noveles n’asturianu feches por una muyer y que foron a ganar el Xosefa Xovellanos, el premiu más prestixosu de les nueses lletres. En Güelu Ismail vais poder percorrer Palestina nun llibru que tien tantu d’homenaxe a la resistencia d’esti pueblu como lo tien de bien escrito y guapo de lleer. Nun vos va deceicionar. Podéis descargalu equí.

La vuelta al mundu n’ochenta díes (Trabe)

Ediciones Trabe yá punxo la selmana pasada en llibre accesu “La Vuelta al Mundu n’Ochenta díes) y, a xulgar polo qu’afirmen nes redes sociales, la so intención ye poner en llibre accesu’l PDF d’un llibru del so catálogu de baldre pa poder lleelu y consultalu. Nesti casu tamos énte la torna que fixo Xesús González Rato del clásicu del escritor francés Jules Verne, una hestoria que cuenta cómo un caballeru británicu de finales del sieglu XIX fai una apuesta pa dar la vuelta al mundu en menos d’ochenta díes gracies a la esistencia de medios de tresporte afayadizos como los vapores y el ferrocarril.

Les ruines (Suburbia)

Les Ruines ye ún de los llibros más destacaos del escritor Xandru Fernández. Llévanos a hestories de la Guerra Civil, posguerra y antifascismu. Trátase d’un llibru que yá asoleyara Trabe, que reeditó Suburbia y qu’agora, yá descatalogáu, punxo la editorial xixonesa en llibre accesu. Ésti y otros llibros de Suburbia puen descargase nel grupu de Facebook públicu “Suburbia Ediciones” o podéis dir direutamente equí.

Los clásicos (Asturies.com)

¿Cuándo ye un mal momentu pa lleer a los clásicos de la lliteratura asturiana? Pásanos como con esta llista de llibros de baldre a la hora de falar de los clásicos: Nun tán tolos que son, pero sí son tolos que tán. El “Proyeutu Caveda y Nava” ye una dixitalización de cantidá d’obres de la lliteratura asturiana anteriores a 1950. Nesta páxina web ( http://asturies.com/cavedaynava/ ) vamos poder atopar obres de Xosefa Xovellanos, Antón de Marirreguera, Pin de Pría o Caveda y Nava. Una montonera de testos pa descubrir cómo s’escribía l’asturianu va dos, tres, cuatro y hasta cinco sieglos.

Leave a Reply

La to direición de corréu nun va espublizase. Los campos riquíos márquense con *