¿Quién diba imaxinar que los xuegos olímpicos diben contar un día con deportes como’l skateboarding? La historia de los deportes olímpicos ye la d’una actualización constante (y delles veces poco estable) na que se mecen disciplines con muncha afición y poca historia (como ye’l casu del skateboarding) y otres más vieyes que vienen ya de la dómina de la Grecia clásica como ye’l casu del atletismu.
Deportes colo la Pelota Vasca entren y salen del menú de les olimpiaes; otros bien tradicionales como los bolos asturianos y la llucha llionesa nun tán nin paez que se los espere y, otros, tuvieron o tán de xemes en cuando como “deportes d’amuesa”; como foron, por exemplu, l’automobilismu.
Anque, globalmente, los más vieyos caltiénense, nel mundu de los deportes, si se lu mira de mou históricu, nun fixo más que medrar cada vuelta con más y más disciplines estremaes. El menú de les olimpiaes de Toquio de 2020 poco tien que ver col de les olimpiaes que se facíen a entamos del sieglu XX. Por eso, nun ye difícil imaxinar un futuru nel que vamos ver, al pie de los deportes d’anguaños, otros muncho más nuevos como podríen ser, por casu, los combates o lluches de robots.
Les lluches de robots predixéronles (tamién) los Simpson
Si daquién piensa que ye ciencia ficción y una suposición, enquivócase. Les lluches de robots esisten dende va un tiempu y tienen cada vez más almiradores. L’orixe d’esti deporte vien de va 33 años, cuando en 1987 la Denver Mad Scientists Society organizó’l primer combate de robots na convención de Ciencia Ficción de Denver (MileHiCon). D’entós p’acá la historia ye intermitente. Hai iniciatives que nun tienen continuación equí y ellí, anque foi a partir del Robot Wars británicu, qu’acabó en televisión, cuando entamó a medrar en serio l’afición por esti tipu de deporte. Yera ésta una de les primeres veces que s’emitía na televisión un conteníu d’esta triba.
Sicasí, la cume de la popularidá de les lluches de robots nun diba llegar hasta que, un poco más sero, aportare BattleBots a la canal americana xeneralista “ABC”. Esti programa, que yá viniere d’una canal de comedia, acabó asitiándose como ún de los más populares y tuvo bien de temporaes. Tanto Robot Wars como BattleBots son dos programes que vienen y van de la televisión y d’una canal a otra, resistiéndose a morrer y amosando una afición que nun abocana.
¿Cómo ye una llucha de robots?
Pal que nunca la vio, una llucha de robots tien elementos que mos faen recordar un combate de llucha llibre y otros que son totalmente nuevos. De mano, nes lluches de robots nun son solo dos robot los que s’enfrenten sinón, tamién y tres d’ellos, dos equipos d’homes y muyeres que los remanen y que, les más de les veces, los diseñaron. Nun se trata de robots (non pel momentu) con intelixencia artificial y que seyan quién a decidir o actuar por sigo mesmos, sinón que son versiones más “cares” (y destructives) del típicu coche teledirixíu.
Tocante a les capacidaes destructives, hai que dicir que camuden muncho d’un modelu a otru y que nun suel haber más llendes que les qu’estableza la propia organización de la competición. Por esto, ye fácil ver robots que tienen dispositivos mecánicos colos qu’estrapallen al enemigu, otros con fueu, otros que meten trallazos de lletricidá, otros que faen por llevantar al otru robot…. Tamién tienen sistemes de defensa y cuasi toos tienen la capacidá de ponese arrechos depués d’un impautu. Y ye que nun se trata solo de que puedan esgonciar al robot enemigu, sinón de que tienen que poder caltenese operativos y funcionales pa poder movese, escapar d’él o atacalu. Al final, les regles son asmeyaes a les de los más de deportes de combate solo que, nesta clase de lluches suel perdese por “KO”; por ye difícil sacar al enemigu de la zona de xuegu (anque non imposible, pos en delles modalidaes hai máquines en dellos puntos del terrén coles qu’estrapallar al enemigu..
¿Más deportes con robots?
La llucha de robots nun ye l’únicu deporte nel qu’intervienen los robots. Hai bien de disciplines que copien a los deportes qu’hai yá pero sostituyendo les persones por robots, como ye’l casu del fútbol de robots. Eso sí, nestos casos nun se trata tanto d’un equipu humanu que remane los robots como d’una intelixencia artificial que tien que ser quien a procesar les estremaes xugaes y estratexes pa poder facer gol.
La llista de deportes de robots que completen a les lluches y al fútbol ye enforma grande. D’esi mou podemos contar amás d’estos dos, otros como la ximnasia, l’esquí, l’atletismu, el saltu, la natación… etc. Como nos otros robots sacantes la llucha, la intervención del ser humanu suel ser mínima y nun se trata de deportes que tienen afición y competición, sinón, más bien, de coses que se faen como amuesa de les capacidaes teunolóxiques.
