“Lin xube al carabín” (Pintar-Pintar, 2021) ye’l nuevu llibru de Lluis Aique Fernandi. Nun ye’l primer llibru protagonizáu por “Lin”, pos yá asoleyare “Lin quier esnalar” cola mesma editorial. Amás, Lluis Aique ganare’l premiu Josefa Canellada de lliteratura infantil y xuvenil cola novela curtia de terror “Invisibles”, una de les obres más valoraes pal públicu adolescente coles que cuenta la lliteratura asturiana. En Refueglu! quiximos conocer de primer mano les impresiones del autor y en qué coses anda trabayando.
¿Qué vamos atopar en “Lin xube al carabín”? ¿Vamos hacia una saga de más entregues?
En Lin xube a Carabín vamos atopar un cuentu más terrenal que Lin quier esnalar. Pasa de lo onírico y personal del primer cuentu a un día cola güela pa conocer los espacios que compartimos con otres persones. Ún pue preguntase si ye’l mesmu Lin, el de los dos cuentos. Yo cuido que sí. Tenté de mirar les coses colos güeyos d’un neñu con sentimientos, orixinalidá y personalidá. Otra cosa ye que lo consiga, claro. Pero esa foi la idea dende’l primer llibru, la de crear una “saga” con un neñu que mira la vida y la realidá que lu arrodia con otros güeyos. Lo que me da mieu ye que, en cuenta de pintar un neñu, Lin seya namás la idea que tien un adultu de la neñez.
¿A qué públicu taría empobinada la obra?
Paez que los llibros de Lin-yos presten muncho a los adultos, y eso ye bono. Tamién me lleguen noticies de qu’hai neños a los que tamién-yos presten, y eso ye meyor entá. Asina que, si tengo qu’acutar una estaya d’edá pa los cuentos de Lin, diría que son pa neños de 0 a 99 años.
¿Cómo ves la salú de la lliteratura infantil n’asturies?
Nun sabría dicite cómo ta la salú de la lliteratura infantil n’Asturies. Dame que ye lo que más se viende de lliteratura. ¿Sedrá porque ye un públicu cautivu de los padres y los maestros? Nun quiero ser pesimista, pero dalgo facemos mal colos llibros y la escuela si acabamos educando non-llectores. D’otra banda, hai coses precioses en lliteratura pa neños, pero tamién hai muncho de, dame, considerar a los neños como una versión poco fecha de los adultos, mui de “esto nun lo cuento porque nun ye de color rosa o nun lo van entender”. Espero nun cayer yo neso nos llibros vivientes de Lin (si m’aguanten en Pintar-Pintar).
Amás del testu, una cosa bien prestosa que tienen los llibros de Lin son les ilustraciones: ¿Cómo ye la rellación escritor ilustrador? ¿Coordináisvos o ye la editorial la qu’encarga les ilustraciones depués de que tu-yos unvies el testu?
Les ilustraciones son mui prestoses, sí. Pal llibru anterior escoyóse una técnica de grabáu en maera que-y dio a la historia un aire mui artístico, en blancu y negru, apotao pa un cuentu más esistencialista y qu’a min, nun sé si ye poles sielles de bambú de les ilustraciones, paezme mui caribeñu. Pa Lin xube a Carabín, sicasí escoyóse l’acuarela, con unos colores pastel y cercanos a la tierra, con horros, oveyes, pites y tartes d’almendra que faen de la historia dalgo mui asturiano. Dengún d’estos aciertos artísticos son responsabilidá de mio. Iranidis Fundora, a la que mando un saludu candial, ye una ilustradora cubana que vive en La Habana, pero que pasó un tiempu n’Asturies trabayando con Pintar-Pintar. La editorial dio-y los mios textos y Iranidis fizo les propuestes espectaculares que se puen ver nes publicaciones. Prestaríame un día conócela en persona.
¿En qué proyeutu tas trabayando agora?¿Plantégueste escribir dalgo de narrativa p’adultos? ¿En qué xéneru?
Agora mesmo toi un poco recuperándome. Dióme unos problemucos el corazón hai un mes, pero yá toi bien y estos díes empecé a escribir una historia de terror p’adultos (si ye qu’eso esiste, lo de los adultos). Yá lo esploré con Invisible y paez que me presta porque pueo falar de lo que ta nos márxenes, que son muncho más interesantes y importantes que la masa que (con)forma’l centru. Nun sé, igual ye qu’esa masa central ye igual perdayuri y que la única personalidá que-yos queda a les sociedaes modernes ye lo que s’asitia nos márxenes. A ver cuando sigo con una ucronía y otru par de cosines sobre historia. Lo que sí quiero tamién ye siguir mirando esti mundu colos güeyos de Lin, pue que tratando temes menos amables que los d’estos dos primeros llibros.
Podéis mercar “Lin xube al carbayín” na web de Pintar-Pintar calcando nesti enllaz.
