Va tiempu que s’anunció una entrega nueva d’El rei lleón, una que siguiría cola estética d’animación 3D de la versión de 2019, magar que la modernización nel estilu nun foi del gustu de toos. Sabíemos que nesti casu diba ser una “precuela”, que llamen, a la contra de lo que ficieron cola versión orixinal, siguida naquella por una continuación con un Simba adultu. Y tamién teníen dicho que’l direutor diba ser Barry Jenkins, yá bien galardonáu por Moonlight.
Agora lléguennos más noticies, como que va ser una hestoria que Timon, Pumbaa y Rafiki van contar (apostaríemos qu’a un fíu de Simba y Nala) sobre cómo llegó Mufasa a facese col tronu, pos resulta que nun-y llegó cayíu del cielu, sinón que yera un güérfanu. Tamién va tener un papel importante, cómo non, Scar, y ye que, acabante d’estrenar un cómic de Dynamite col villanu como protagonista, agora cuenten que quieren da-y un papel central na película, afondando na rellación ente él y Mufasa y en cómo y por qué él se volvió tan malu. Sedría, asina, un xiru del personaxe que busca da-y tridimensionalidá, pinta qu’al estilu de lo que ta faciendo Disney últimamente con otros villanos, como yá pasó nes películes de Malificent y Cruella.
El cómic, a estes, ye una serie curtia de Chuck Brown (Flawed, Black Panther) y Trevor Fraley (F.O.R.C.E.), y fai parte d’una llinia nueva que de momentu tamién tien sitiu pa Maleficent.
Contámosvos más en cuantes que lo sepamos, por supuestu.
