Monarch: Legacy of Monsters ye la serie ambientada nel “monsterversu” qu’AppleTV+ va trayer en poco más d’un mes, y qu’enancha l’universu cinematográficu de monstruos xigantes que tán construyendo coles películes nueves de King Kong y Godzilla. Monarch ye la organización que les combate, y que fai un poco del SHIELD d’esti universu que va conectando unes películes con otres, y ye al traviés d’esta que vamos ver agora creatures nueves a les que tienen d’enfrentase y un mayor tresfondu del mundu compartíu y la organización mesma.
Facémoslo, amás, pelos güeyos d’un personaxe que ta metíu na guerra contra los monstruos dende va munchos años, y ye por ello que lu van interpretar dos actores: Wyatt Russell de mozu y Kurt Russell yá de bien paisanu.
Tocántenes a lo que vamos atopar na serie, cuando se-y preguntó al responsable si diben apaecer otros monstruos conocíos (la serie ta fecha en collaboración con Toho, la propietaria intelectual de Godzilla y otros milenta bichos xigantes), el responsable Matt Shakman (WandaVision) respondió que “una de les meyores coses de la serie de Godzilla foi la oportunidá de crear titanes nuevos, monstruos nuevos p’amestar al Monsterversu. (…) Nun quiero adelantrar demasiao pa que podáis emocionavos colo que vais alcontrar cuando veáis el programa”. Asina, la cosa nun nos queda clara… Sicasí, si queréis echar una güeyada a lo que nos espera dexámosvos l’avance calcando equí.
Recordámosvos, amás, qu’esti universu ta bien vivu anque va cumplir yá la década, pos en 2024 va estrenase Godzilla x Kong: The New Empire, entrega na que, polo que cuenten, dambos dos monstruos van tener d’unise escontra una amenaza común.
