La vuelta a la normalidá ta trayendo otra vez actividaes venceyaes a lo friki y l’ociu alternativu a Asturies. En branu tuvimos la Metrópoli Comiccon, y setiembre entamó cola vuelta de la Cometcon a Xixón, con una asistencia ablucante, pero tovía nos queden munches opciones hasta que fine l’añu.
Del llunes 6 al sábadu 11 celebróse pela tarde nel FNAC de Parque Principáu la Selmana del Manga, na que cada día había una actividá venceyada direutamente o indireutamente a esti xéneru. Estes actividaes celebráronse col motivu de promocionar el Salón del Manga d’Asturies, que se va facer los díes 23 y 24 d’ochobre n’Avilés nel Recintu Ferial de La Madalena.
Vamos facer un percorríu poles actividaes que se fixeron cada día:
El llunes foi’l día de la presentación del Salón por parte de los organizadores, que tamién adelantaron un poco de lo que va ser el conteníu de la convención y de les actividaes que se fixeron durante tola selmana nel centru comercial.
La tarde del martes tuvo dedicada a los xuegos de rol. Escoyeron una partía inspirada nel manganime My hero Academia y foi dirixía pola Asociación de rol Odisea Astur. Nella, los participantes tuvieron que metese nel papel de los estudiantes de l’academia de la serie y pasar, como ellos por delles pruebes y retos.
El xueves (el miércoles taba zarrao porque foi’l Día d’Asturies), hubo dos actividaes perprestoses. La primera d’elles foi un taller d’Iniciación al xaponés a cargu de Miyuki Horiguchi, anguaño profesora de xaponés na Casa de les Llingües de la Universidá d’Uviéu. La segunda actividá foi una charla d’Iniciación al Cosplay, dirixida pola cosplayer asturiana Nito (@nito_31) y la cosplayer y idol asturiana Rubyairan (@rubyairan), na que desplicaron a los asistentes lo que ye’l cosplay y per ónde entamar, trucos y ónde mercar les coses.
El vienres Miguel Martínez presentó dos de los sos llibros nos que fala del universu del Final Fantasy y del universu de Dragon Ball.
Y pa finar, el sábadu hubo una Pasarela de cosplay. Nun foi un concursu y dafechu podíes subir con cosplays compraos o fechos por ún mesmu, foi una exhibición. Hubo cuarenta participantes, polo que la Pasarela tuvo hasta que se dividir en dos turnos. Solo por participar daben una entrada de cine y entrabes nel sortéu de dos vales pa usar na tienda. Amás, punxeron unos vestuarios pa que los participantes se pudieran cambiar.
Les actividaes tuvieron mui bona acoyida, sobre too ente xente mui mozo, lo qu’amuesa que l’ociu alternativu tien de ser una inversión pa ufrir actividaes distintes.
Les feches pal Salón (que nun se pudo facer l’añu pasáu pol aciu del coronavirus) son, como yá diximos, el 23 y 24 d’ochobre. La entrada ye de baldre y va tener pel día horariu de siguío. Magar que nun anunciaron los invitaos y espositores, sábese que va haber los concursos habituales de cosplay, cover dance y karaoke. Amás, va haber una zona comercial y tamién una zona d’artistes, onde se van poder atopar a la venta obres venceyaes a la temática del eventu de distintes partes d’Asturies y d’España. Tamién va haber talleres y charres que van a entamar a anunciar bien ceo. El cartelu foi fechu pola artista asturiana Nekhuro.
El Salón del Manga d’Asturies foi una de les primeres convenciones d’ociu alternativu que se fexo n’Asturies y entamó’l so andanciu en 2008 n’Uviéu y pasó per delles asociaciones y sitios enantes de movese a Avilés a cargu de l’Asociación Nikaku-dan. La primer edición que se fexo n’Avilés foi en 2016, y el Salón del Manga pasó a ser otra de les cites anuales alternatives xunto al Celsius 232 y les Xornaes del Cómic d’Avilés.
