Si hai una mena d’histories que ta de moda anguaño ye’l retelling, ye dicir, volver a contar una historia dende otra perspeutiva, cambiando’l tiempu, el llugar, los personaxes o la interpretación de la historia orixinal. Esto yá taba inventao, lleva faciéndose sieglos, nun vamos a engañar a naide. Son munchos los retelling que podemos atopar nos caberos años, tanto nel cine como na lliteratura, dalgunos con títulos tán llamativos como Orgullu y prexuiciu y zombies, Wicked: memories d’una bruxa mala, o na lliteratura de nueso (anque tien unos años más) Antígona, por exemplu de Nel Amaro.
Sicasí, güei nun ye d’estos de los que vamos a falar, güei vamos falar d’ún mui especial, ún que s’entamó a espublizar en 2018 y qu’algamó munchísimos siguidores na cuarentena: Lore Olympus, de la neozelandesa Rachel Smythe. Esta historia vien en forma de cómic en formatu dixital (ta en llinia, entá nun hai versión física), ta espublizada na plataforma Webtoons y yá tien más de 150 capítulos que s’espublicen semanalmente. Nesta plataforma podéis alcontrar una montonera d’histories de baldre, y amás en formatu vertical, lo que fai que sía fácil de lleer en tabletes o móvil. Si vos presten los cómics camiéntovos a visitar la plataforma, porque daveres qu’hai ehí ayalgues como la que vos trayemos güei.
La historia de Lore Olympus ta centrada na historia del raptu de Perséfone y la so rellación con Hades, pero al traviés d’esto cuenten les histories de parte del panteón olímpicu y toles sos rellaciones y problemes. La historia ta asitiada nuna época actual y los dioses lleven munchos años col trabayu de ser una deidá, y tienen cientos d’años, demientres que Perséfone ye una mocina inocente y ta acabante d’entrar nesi mundu.
Pero, ¿qué tien d’especial esti retelling que lu fai tener tantu ésitu? Bono, vamos mentar que los dibuxos son perguapos y l’usu los colores tamién, venceyaos hasta a los estaos d’ánimu de los personaxes. Sicasí, esto nun ye lo que lu fai tan especial: lo que lu fai especial ye que la historia ta venceyada a tolo que pasen los personaxes (y güeyu que nes siguientes llinies vienen dellos spoilers), especialmente Perséfone. Nesta historia son mui protagonistes los fechos traumáticos y cómo estos personaxes los van superando y evolucionando al empar que viven con ellos.
La historia tien partes mui dures (y dafechu cuando un capítulu inclúi dalgo asina siempre hai una alerta), como la violación de Perséfone (nesta historia ye Apolo) y el mieu a cómo la xulguen y cómo se siente, y el mieu que tien pola so reputación como diosa y cola so ma Deméter. Deméter ye nesta historia una empresaria y una muyer lluchadora, que tuvo atapeciendo que la so fía tien una doble cara que nun pue controlar siempre, y que ye al empar una diosa de la vida y la muerte. Tamién nos fala del maltratu familiar, nesti casu de Cronos a Hades, que tien velees una y otra vez colo que-y fixo’l pá. Otru de los personaxes con una construcción ablucante ye Hera, y como aguanta les infidelidaes una y otra vez de Zeus, y como tenta de que too funcione, siendo ella la verdadera filandera de que tol Olimpu furrule perfeutamente. Y magar too esto, atopamos pente medies un montón d’histories secundaries actualizaes, como ye’l casu de Eros y Psique, o personaxes como Eco, Hécate o Etna.
Animaos quedáis a lleer esta nueva versión de Perséfone y Hades, muncho más moderna y humana, y si tenéis un poquitín más de tiempu, a percorrer esti nuevu formatu d’histories.
