Por Adrián Carbayales

Nes películes píntenlos percuriosos, un exemplu pa los neños o pelo menos non demasiao sinvergüences, pero hai cómics por demás como pa que toos ellos perdieren los papeles en dalgún momentu. Vamos ver dellos actos que cometeron los Vengadores más nomaos y que les películes nun s’atreven a amosar. Amás, hai dicir, que lo que cuntamos d’asistío nun ye daqué que pase n’univeros alternativos, nos que los personaxes nun se comporten como normalmente, ye canon na so historia y nin el mesmísimu Stan Lee dende’l so tronu n’Asgard pue borralo.

Thor, filonazi y bombarderu:

Hitler recurrió a abondes ocurrencies pa ganar la Segunda Guerra Mundial, y una d’elles foi apellar al mesmísimu dios del truenu. A Thor prestó-y lo qu’aquel homín-y cuntaba de que’l so pueblu yera’l que-y daba cultu acuantayá, y qu’agora-y pidía ayuda escontra los exércitos del este que tentaben d’acabar con él. Allá foi Thor, y tuvo a puntu de matar a Stalin, pero Los Invasores (el superequipu que daquella encabezaba’l Capitán América) y el que décades más tarde sedría’l Doctor Doom fixeron que l’asgardianu se desengañara y tornara pal so mundu.

El dios nun volvió pa la tierra fasta venti años dempués, cuando Odín lu castigó convirtiéndolu nun home vulgar que nun tardó en tropezar col martiellu y escomenzar la so carrera como superhéroe. Nuna de les primeres aventures enfréntase a L’Home Radiactivu, un supervillanu chinu del que yá podréis albidrar los poderes pol nome. Pa vencelu, Thor aviéntalu pal so país, y al estrellase esplota como una bomba nuclear. Da la impresión de qu’arrevienta nun monte despobláu, pero 1963 nun yera mui bon añu p’andar llanzando misiles nucleares de los Estaos Xuníos a un país comunista.

L’Home fierru, alcohólicu y asesín a sangre frío:

Nes películes yera normal ver a Tony Stark con una copa na mano, y nuna fixeron chancia con que ponía l’armadura enfiláu y montaba una escena. Nos cómics la cosa foi muncho más lloñe, pos tornóse alcohólicu perdíu y tuvo cerca de matar persones a esgaya cuando-y dio por desapartar de la vía un tren escarriláu. Nun foi fasta aquella que se decató de que lo que taba faciendo nun yera nin medio normal y que tenía de dexar la bebida. L’exalcoholismu ye daqué que marcó fondo al personax y que dende entóncenes ye mui recurrente nes sos hestories.

Años dempués, el supervillanu Immortus manipuliólu y alloriólu, de forma qu’acabó matando trés muyeres (una superheroína, una neñera y la encargada de les rellaciones públiques d’un equipu superhéroes). Pa igualo… enguedeyaron un poco les coses: Redimióse morriendo, sustituyólu’l so yo del pasáu, esti tamién morrió, resucitaron como ún solu coles alcordances de dambos (y d’un terceru) y nun xuiciu los Vengadores consideraron que nun tenía culpa de nengún de los asesinatos. Dizse pronto. Al contrariu que lo del alcoholismu, tolos autores se refuguen de mentar esta hestoria, que ye meyor escaecer. Coses de los llocos años noventa.

Capitán América, un picaflor:

¿Qué dicir del héroe abanderáu que siempres fai lo que creye correutu? Poco cuando nun ye la versión d’otru universu, lu drogaron o lu atrayeron… pero dalgo hai.

Steve Rogers espertó tres pasar dos décades xeláu, y nun tardó en namorase d’una mocina, Sharon Carter, que yera calcada a la muyer que quería nos años cuarenta, Peggy. Resulta que yeren hermanes y, cuando la mayor apaeció amnésica, ensin saber nada de lo que tenía pasao en tou esi tiempu… Bono, el Capitán pensó que lo meyor yera salir coles dos al empar. La hermana pequeña sabíalo, y comentaba con él lo chocha que taba Peggy mientres andaben escondiéndose pa nun la mancar. A ver, ho, Capi, esa “A” de la tiesta nun representa solo Utah.

L’Home-formiga y l’home-araña, unos maltratadores:

Nun falamos equí de Scott Lang, l’Home-Formiga que nes películes interpreta Paul Rudd, sinón del interpretáu por Michael Douglas. Esti punxo munchos nomes de superhéroe nos cómics: Home-Formiga, Home Xigante, Xaqueta Mariella… Esa inestabilidá refléxase tamién nel calter, y tien un bon historial de maltratu a la yá so exmuyer, l’Aviespa (nes películes Michelle Pfeiffer). Cuando ta frustráu por nun ser quién a inventar más coses, amargulíu por ser el creador del supervillanu Ultrón (non como nes películes, que ye cosa de Stark), viendo que la muyer gana más perres como diseñadora de moda qu’él como científicu, y colos Vengadores queriendo xulgalu por actuar irresponsablemente, los desprecios a la muyer acaben convirtiéndose nuna mocada tan fuerte que la tira al suelu. Hai quien-y echa la culpa al efeutos secundarios de les partícules que-y permiten cambiar de tamañu, pero hai munchos otros héroes que les usen y nunca nun fixeron nada asemeyao. Arriendes de que, pelo menos lleendo los sos cómics anguaño, el so comportamientu pa con ella nunca nun yera mui exemplar dende l’entamu.

¿Y qué pasa col nuesu amigu y vecín Spider-Man? La llamada “Saga del Clon” ye un bon enguedeyu que traxo de cabeza a los llectores de los noventa y que resulta perdifícil d’esplicar, pero vamos tentar de resumir lo necesario. Daquella diba un tiempu que remaneciera un tal Ben Reilly, un clon de Peter Parker colos sos mesmos poderes y alcordances que creyíemos muertu dende los años setenta. Per otru llau, Peter dexara embaranzada a Mary Jane, y nun-y prestaba muncho la confianza que vía qu’esta tenía col so “hermanu”. Cuando unes pruebes demuestren (más tarde sabríemos que falsamente) que’l fetu ye anormal porque en realidá Peter ye’l clon y Ben l’Home-Araña verdaderu, l’héroe alloria y ataca al ximielgu creyendo que-y va robar la vida. Mary Jane trata d’aparalu, y entós él da-y un truscu col que la arrefundia escontra la parede. Hai dicir nel favor de Peter que se decata nel intre de lo aborrecible del so actu y fux avergoñáu, pero ye daqué que nun pue borrar. Bono, eso nun ye verdá, llueu borró de la realidá tol matrimoniu… Ba, eso ye otra hestoria, y pa otru momentu.

La bruxa escarlata, xenocida:

Nos cómics, como na escelente serie de televisión, la Bruxa Escarlata y Visión casaron y tuvieron dos fíos, non como resultáu ralu del sexu ente una muyer humana y un robó, sinón gracies a que la mutante ye a alteriar la realidá. Siendo fíos falsos, los collacios empobináronla a borralos de la esistencia, y cuando años dempués foi a recordar lo que fixera allorió dafechu y entamó una de la virxe, matando dellos superhéroes y creando una realidá nueva na que too taba tracamundiao. Cuando los Vengadores y los Homes-X la abocaron, proclamó que los mutantes como ella yeren monstruos y, coles pallabres “non más mutantes”, fixo que cuasi un millón d’ellos perdieren los poderes y se convertieren n’humanos. Malapenes quedaron unos cientos, y como l’Homo superior ye una especie distinta al Homo sapiens, nun pue definise actu talu más que como un xenocidiu espantosu.

Leave a Reply

La to direición de corréu nun va espublizase. Los campos riquíos márquense con *