Va nada (equí) contábamosvos que Disney empieza a mirar con llupa cuálos son los proyeutos colos que van siguir los planes, pos lleven tiempu pensando que quiciabes tán sobreesplotando les franquicies de Star Wars y l’Universu Cinematográficu Marvel. Asina, tán dexando pa prau delles películes que yá teníen anunciaes, pero hai otros proyeutos de los que sí nos lleguen novedaes y que muestren que van p’alantre.
Ún d’ellos ye la serie Skeleton Crew, que va dir sobre un grupín de neños que se pierden n’espaciu, y han buscar el camín de vuelta a casa. Hasta agora namás sabíemos que va contar con Jude Law nun papel importante, dalgo asina como d’un bandoleru espacial de bon fondu, y hai quien fala de que quier dar a la saga un toque a The Goonies. Bien, pos agora sabemos que ficharon, pelo menos pa un episodiu d’esta serie (nun sabemos si pa más), a Daniel Kwan y Daniel Scheinert, los direutores de la esitosa Everything Everywhere All at Once acabante de ganar diez óscares.
Tocántenes a ello, Daniel Kwan anunció en redes que, polo que se ve, ye una cosa más bien aneudótica, y que’l proyeutu viniente que tienen ye dalgo orixinal d’ellos. “Encántennos Jon (Watts, showrunner de la serie), Star Wars, deprender a manexar teunoloxía nueva, conocer nuevos equipos téunicos y artísticos” amestó. Ye una collaboración que yá taba fecha d’enantes del bombazu de los Óscar, pero que foron a guardar en secretu hasta agora.
