Gremlins: Secrets of the Mogwai ye una serie d’animación a puntu d’estrenase en HBO Max, ¡yá en nada!, el próximu 23 de mayu. Y, como podéis suponer pol títulu y pola imaxe de portada, esta va trayer de vuelta los monstruínos de les dos películes mítiques de Joe Dante, Gremlins (1984) y Gremlins 2 (1990).
Nuna dómina de readautaciones, refritos y rellanzamientos munchos se preguntaben cómo yera que nun esplotaben esta saga tan famosa, y tamién debíen tar preguntándose lo mesmo en Hollywood porque lleven unos cuantos años falando de facer una tercer película, masque nunca nun acaba de llegar. Por embargu, lo que sí que no llega agora ye esta serie d’animación dixital que sirve como “precuela” de la película orixinal, de momentu con una temporada de diez episodios. Nella, un rapacín alcuentra a Gizmo y vese obligáu a viaxar per China y enfrentase a creatures propies de la mitoloxía nacional, too col envís de devolver al bichín cola familia. Por supuestu, la cosa va complicase cola versión fea y violenta del mogwai, una tropiella de gremlins que los escuerre.
Yá podéis ver (calcando equí) un avance estensu qu’acaben de sacar y qu’a los señardosos de xuru que-yos mueve dalgo n’interior. Tamién hai quien ta un poco dececionáu con que de momentu namás tengamos dibuxos animaos, pero tamos bastante seguros de que ye cuestión de tiempu que los monstruínos estos vuelvan a los cines.
