Vivir en Skyrim, como a la hora de vivir, hai dos maneres de facelo: la bona y la mala. Y la bona, en dambes situaciones, ye siempre lleendo la mayor cantidá de llibros posible. Porque, por si dalgún nun xugó entá a Skyrim, ésti ye ún de los poquísimos títulos que mos permite lleer. Y cuando dicimos lleer, nun mos referimos a lleer los diálogos, los menús, les instrucciones que pue tener cualquier xuegu. Referímonos a que ye ún de los pocos xuegos (¿L’únicu?) que mos dexa aparanos, sentanos nun sillón y ponenos a lleer llibros que van dende la historia (del universu de The Elder Scrolls) hasta la narrativa de ficción pasando, cómo non, por otros más llamativos como’l relatu eróticu.
Hai quien lleó tolos llibros de Skyrim y tien una opinión sobre caún d’ellos. Hai vídeos fechos d’estes coses como ésti, que ye bien interesante mirar.
Sicasí, equí la entruga que mos facemos ye otra: ¿De qué xéneru lliterariu son? Asumiendo que tovía tenga xacíu falar de xéneros llitrarios (¿Tienlo?); el casu ye que tamos énte un fenómenu que ye abondo nuevu na lliteratura. Nun ye yá’l fechu de que’l propiu videoxuegu se considere lliteratura y narrativa (¡Qué otra cosa diba ser!), ye que dientro d’esta narrativa hai otres narratives de les que disfruten los personaxes (xugador o non xugador) d’esi mundu. ¿Ye posible falar de llibros en Skyrim con otros PNX? Sí, yelo. ¿Hai llibros de toa triba? Sí, hailos. Pero… ¿Un llibru d’historia d’un país que nun esiste… ¿Qué ye? ¿Ficción? ¿O históricu? ¿Y si esi llibru ta enxertu al empar nuna creación narrativa enforma más grande como ye un videoxuegu?
Hai delles noveles n’Elder Scrolls
Cuando dicimos qu’hai “delles noveles n’Elder Scrolls” nun tamos solliñando namás el puntu de qu’hai llibros que tienen forma de novela (anque muncho más curtios, por esixencies del xuegu) nel propiu videoxuegu. Tamos falando de que la cantidá de pallabres que tán nos llibros d’Elder Scrolls ye tala que ye abondo pa superar a noveles bien conocíes y grandes.
Nesti filu, comenten que’l total de los llibros que tán en Morrowind, Oblivion y Skyrim ye de dellos centanares de miles de pallabres. Tamién hai quien se dedicó a poner tolos llibros ún a ún nuna llista con un enllaz a lo que ye’l conteníu de caún polo que vais poder lleelos ensin tener necesidá dala d’instalar o de mercar el xuegu. Val con dir a la Imperial Library y dar con ellos.
