LIBRERIA AMEZ
Los llazos coloraos ye’l llibru n’asturianu más vendíu de 2019.

¿Cuálos son los llibros más vendíos de 2019? En munches ocasiones estos llibros correspuéndense colos premiaos nos premios qu’incluyen edición. Dacuando, son llibros escritos por persones reconocíes como presentadores de televisión o famosos. Otres veces son xente que namás ye conocío dientro del mundu de la lliteratura. ¿Quién son los más vendíos n’Asturies? Refuelgu faló coles editoriales y, según lo que mos respondieron, equí ta’l ranking.

Hai que dicir que non toles editoriales respondieron a les nueses entruges, polo que podría ser qu’esta clasificación nun fore la definitiva pero, coles que sí respondieron a les entrugues de Refuelgu!, el ranking de los llibros más vendíos quedaría de la siguiente manera

Más de 400:

Namás hai un títulu na lliteratura asturiana que sobrepasa los 400 exemplares vendíos en 2019. Trátase de “Los Llazos Coloraos” (Trabe), una novela gráfica d’Alberto Vázquez García ambientada nel Franquismu que trata’l tema de les fuelgues mineres d’últimos de los años 50 y primeros de los 60. Si vos presta’l llibru y la temática, podéis consiguilu equí.

Más de 200:

L’únicu títulu qu’entraría nesta catagoría sedría “Allumamientu” (Trabe), el llibru de Pablo Texón. Trátase d’una obra de gran orixinalidá temática, na que l’autor fai una fonda y personal reflexón al rodiu la paternidá, esperiencia nueva pa elli y mui emocional. Pablo Texón déxanos ver nestes composiciones la facilidá cola que ye a remanar distintos ritmos y estilos en poemes que van de lo popular (añada, blues) a lo visual, ensin escaecer les influencies d’autores como Raymond Carver, Sylvia Plath o Emily Dickinson. Podéis facevos con él equí.

Ente 150 y 200

Cuatro son los llibros qu’entraríen na categoría d’ente 150 y 200 llibros vendíos: Pasaxeres de la Lluna, 42.553, Run y Depués d’Ochobre.

Pasaxeres de la nueche (Hoja de Lata), ye una llibru de Francisco Álvarez que ye una esbilla de les narraciones curties que foi escribiendo’l prestixosu autor que ganó’l Xosefa Xovellanos en dos ocasiones. Si vos interesa’l llibru podéis facevos con él na páxina web de la editorial calcando equí.

Depués d’Ochobre (Ediciones Radagast), ye’l primer xuegu de rol n’Asturianu obra de Nicolás Bardio con ilustraciones de Xon de la Campa que va salir a lo llargu del branu pero que tien la particularidá de facer un réxime de pre-venta; polo qu’en 2019 concéntrase una bona parte de les ventes. Trátase d’un xuegu de rol d’espíes que mos lleva a una Asturies soviética de 1970. Pue reservase na web de Radagast.

42.553 (Trabe) ye un ésitu que va yá pela segunda edición. Esti ensayu de Xuan Santori repasa la hestoria d’un presu mui especial, el que lleva’l númberu que da títulu al ensayu y que tien la carauterística de ser l’últimu presu asturianu nun campu de concentración nazi. El llibru ta agora escosáu pero pue reservase equí.

Run (Baxamar Editores) ye un poemariu d’Alfredo Garay que l’autor define como “un llibru de vida, de temor y valor, de dolor, d’allegría, d’amor, d’inquietúes. Ye un intentu d’ordenar el mio caóticu interior”. Puede alquirise na páxina de la editorial.

Ente 100 y 150

Un osu perfadiosu (Trabe) ye la obra de Víctor Raúl Pintado Rey y Alberto Álvarez Peña. Un llibru de lliteratura infantil que fala de Mel, el mayestru de Xela y Lluques, al que-y presta enseñar les tradiciones y nesta ocasión quier recuperar les mazcaraes d’inviernu, nes que los mozos, amarutaos, percuerren les cais del llugar pidiendo l’aguilandu y faciendo trastaes.

Ariel y Berta. Escursión pel cabu peñes (Trabe) obra de Xurde Fernández y David G. Ferrero; ye otru de los títulos infantiles qu’entren nos más vendíos. Podéis consiguilu equí. Ye la segunda entrega de la serie d’aventures d’Ariel y Berta, dos mellizos que van xuntos a toes partes. Nesta ocasión, ye la primer vez que van dormir fuera de casa ellos solos en tienda de campaña.

1984 (Trabe) la novela d’Orwell tornada al asturianu ye ún de los llibros que más se vendieron en 2019 a pesar de salir a finales d’añu. Con too, contabilizó yá más de 100 ventes en 2019.

Menos de 100

Los llibros Lluvia d’agostu de Francisco Álvarez y Como la muda al sol d’una llagartesa de Berta Piñán (Hoja de Lata) son otru de los llibros qu’en 2019 sigue vendiéndose. Hai que tener en cuenta que les cifres de ventes d’estos llibros son mayores pos lleven unos años en circulación. El llibru de Piñán pue consiguise equí y el de Francisco Álvarez equí.

Casu asemeyáu ye’l de La hestoria de la estrella que nun tenía puntes y la neña que tenía un telescopiu (Delallama) d’Alberto Menéndez, un llibru de lliteratura infantil que fala del descubrimientu que fai una neña emplegando’l telescopiu. Pue mercase equí.

Les Fartures. Ónde comer bien n’Asturies (Delallama) obra de David Castañón, qu’anque en 2020 tea perbaxo de los 100, ye otru éxitu de ventes que totaliza cuasi 300 llibros vendíos no que lleva de percorríu. Pue consiguise equí.

Arón, el Gaturratón (Delallama) ye otru llibru infantil, nesti casu de Pablo Fraile Dorado, que cuenta la hestoria d’un “gaturratón” que ye metá felín metá royedor y que tien qu’evitar que los gatos acaben matando a los royedores. Pues mercalu equí.

3 comentarios

  1. Buenes: soi Milio Ureta. teo de dicivos que Poemes del Amor Simétricu asoleyóse en xunu 2019, y yá n’ochobre sacábemos segunda edición porque los 250 primeros taben agotados. Nun sé si ye que Saltadera nun la cuntáis pero lo ciertu e que ta cuasi agotada la segunda edición. Esto h.az camín de los 400 exemplares. En fin. Asina ye. Namás eso.

    1. Author

      Hola Milio!

      Saltadera peslló, foi por eso que nun pudimos contautala como editorial. Efeutivamente, hai llibros como’l de to que puen tar teniendo una bona difusión. ¡Norabona pol éxitu del to poemariu!


Leave a Reply to milio Encaboxar la rempuesta

La to direición de corréu nun va espublizase. Los campos riquíos márquense con *