¿Cuálos son los llibros más vendíos de 2020? Pasada yá la selmana de les lletres y rexistraes bien les ventes del añu pasáu, retomamos el ranking que fiximos en xunu n’esti artículu sobre los llibros más vendíos en 2019. El panorma lliterariu de 2020 ye bien distintu. Depués d’investigar y de consultar coles editoriales (NDLR: Delles editoriales nun contestaron a les comunicaciones de Refuelgu, polo qu’esti llistáu podría ser imprecisu), equí presentamos el ranking de ventes de llibros n’asturianu de 2020, ventes producíes ente’l 1 de xineru de 2020 y el 31 d’avientu d’esi mesmu añu. Ediciones Radagast, anque distribuyó más de 150 exemplares de Depués d’Ochobre n’asturianu en 2020, la mayoría d’ellos mercárense en réxime de pre-compra a lo llargo del mecenalgu, polo que nun entraría nel ranking d’esti añu, sinón nel del pasáu.
500 exemplares:
El llibru más vendíu, Güeli, ye una esbilla d’histories personales de munches güeles, una especie de reportaxe sobre les vivencies y recuerdos que tuvieron. Una manera d’homenaxear a les hestories de superación y de resistencia. EL llibru escosó en 20 díes los 500 exemplares de la primer edición y sacó una segunda edición que tovía pue mercase nes tiendes en 2021. Edítalu la empresa “Puru Remangu“, especializada sobre too en facer camisetes y otra ropa de calter feminista y asturianu. Esta empresa ganó’l XXXVI premiu Andrés Solar pola so implicación na normalización de la llingua.
Más de 350 exemplares:
La primera novela en ventes, con 354 exemplares vendíos en 2020, ye “La Colomina 36” de Nicolás Bardio (Trabe). La Colomina 36 ye una hestoria ucrónica d’espionaxe en ambientada en 1970 nun “Mieres del Camín al Socialismu”. Mieres del Camín al Socialismu ye la ciudá más grande d’Asturies nun universu alternativu en que trunfa la REvolución del 34 y Asturies entra dientro de la Unión Soviética como una república más. El llibru, que ganó l’Asturies Xoven de Narrativa 2019, escosó la primer edición nun mes y va yá pela segunda. Trátase d’una hestoria inspirada nel universu del xuegu de rol Depués d’Ochobre.
Más de 250 exemplares:
El primer llibru infantil nel top de ventes ye Kikirikí, un llibru d’Alicia Álvarez y David Guardado. Nun se trata nesti casu d’un llibru “a seques” propiamente dichu sinón d’un llibru-discu, que sigue’l trabayu que yá fixeren na llinia de “Bestiariu”, los discos de música pa neños con collaboración d’una bona riestra de músicos del país. El llibru en cuestión edítalu “La Fabriquina”.
Más de 200 exemplares:
Con 203 exemplares atopamos Ariel y Berta van pa Ponga, de Xurde Fernández (Trabe). Ye’l tercer llibru na clasificación de llibros más vendíos de 2020. Trátase d’una hestoria infantil de dos mellizos que yá conocíemos d’otres noveles como Ariel y Berta en Baker Street. Una novela d’una serie que tien munchu tirón pente los más mozos.
Más de 150 exemplares:
Raspiando los 200, con 190 exemplares vendíos, tenemos a “Llugares Máxicos d’Asturies” de Bertu Ordiales, el primer llibru n’asturianu en gran formatu que se financió per aciu d’un verkami en 2019 y ye una edición billingüe castellán-asturianu de los llugares más emblemáticos pa les creyencies mitolóxiques tradicionales.
El siguiente llibru con más ventes de 2020 ye El raitán y el sangrín, de Daniel García Granda (Impronta); con 184 exemplares vendíos l’añu pasáu. Ye’l primer llibru de poesía – un xéneru con muncha tradición y producción nes lletres asturianes – que se cuela nel top.
Síguelu Nunn de Xandru Martino (Delallama) con 158 exemplares. Na novela, ambientada nos primeros años del sieglu I nel castru El Picu (Caravia), nárrense los gafos tiempos de la invasión romana d’Asturies. La vida tranquila nel castru per muchos años vese tarazada por anuncies que falen de columnas de romanos qu’entren pela cordalera y van avanzando pel ríu llena abaxo hasta aportar a les puertes de Noega
El terceru y últimu na categoría de llibros qu’algamaron 150 exemplares vendíos en 2020 ye La llingua de les xanes, de Pablo Fraile Dorado y Paula de la Fuente Atienza (Delallama). Nel so pueblu, solo Nela conoz la llingua de les xanes, y quiciás nin con eses puea descifrar un gran misteriu: les vaques d’alredor enfermen y tiemblen y marchen. Ye entós cuando Nela sal a buscar un remediu, topándose, pel camín, con otros seres mitolóxicos —l’home llobu, el pataricu, el cuélebre, la llavandera—. ¿Ayudaránla, entre toos, o quedrán engañala? ¿Y si Nela nun fuera más qu’una neña? Una «guaḥa fantasiosa» a quien nengún adultu creye.
Más de 100 exemplares
Con más de 100 exemplares vendíos en 2020 tenemos una bona riestra de llibros que completaríen los 13 primeros del ranking de llibros vendíos n’asturianu.1
138: Va tiempu d’ Elena García y María Ortiz (Pintar-PIntar))
134: Xosefa de Xovellanos La Esbelta. La dama ilustrada de les Lletres Asturianes de Vicente García Oliva y Ilemi Cuesta Mier (Pintar-Pintar)
116: Les isles inciertes, Xuan Bello (Trabe)
114: Los tres gochinos y el llobu, de Charles Perrault / María Perera (Impronta)
112: El coríu feu de H. C. Andersen / David G. Ferrero (Impronta):
100: El silenciu invisible, José Ángel Gayol (Trabe):
