Va namás trés díes (podéis velo calcando equí) contábemosvos que Marvel recuperaba la llicencia pa reeditar ROM, Spaceknight, una serie clásica basada nun moñecu electrónicu de Hasbro, y que, por mui bon recuerdu que tuvieren d’ella los aficionaos, había un enguedeyu tremendu colos derechos d’autor pol que llevaben delles décades ensin poder sacar de nueves los cómics. L’anunciu, amás, empezó a facer surdir teoríes y rumores sobre si esto suponía parte d’un proyeutu más grande.
Bien, pos el casu ye que sí. Ayeri, Marvel anunció la reedición d’otra llicencia clásica d’una llinia de xuguetes qu’agora pertenez a Hasbro, The Micronauts. Ente 1979 y 1984, Marvel espublizó esta serie sobre unos habitantes del “Microversu” (lo que nes películes d’Ant-Man llamaron “Reinu Cuánticu”, precisamente polos problemes de derechos), y que na llucha escontra un dictador malváu del so mundu acaben nel de nueso… a tamañu de les figures d’aición que daquella taben a la venta. Nel sieglu XXI la llicencia tien pasao per otres editoriales, pero nunca con tantu duramientu.
Agora, qu’una segunda franquicia de Hasbro s’amieste a l’acabante d’anunciar de ROM (una que, amás, yá s’insinuó como esistente nes películes del Universu Cinematográficu Marvel) produz más revuelu tovía peles redes y fai pensar nun alcuerdu pa siguir con estos personaxes (y pueque otros de la compaña, como ye G.I. Joe) con series nueves nel actual universu comiqueru Marvel y llevales tamién al cine, en forma de películes qu’enanchen el catálogu de los estudios cinematográficos.
El primer gran volume de les aventures de los Micronautes, obra de Bill Mantlo y Michael Golden, tovía va facese esperar, nun va salir hasta dientro d’un añu. Pero ta claro que, ente esto y ROM, Spaceknight, Marvel ta dando pasos nuna direición que, anque nun ta clara, paez bien granible.
