Ún de los productos más llamaderos que Marvel Studios saca en Disney+ ye la serie basada nos cómics homónimos, What If…? (lo que n’asturianu ye la pregunta “¿y si…?” o “¿qué pasaría si…?”). Con estos, a los qu’en cada historieta sigue una pregunta distinta como “¿Y si Spider-Man rescatara a Gwen Stacy?“, o “¿Y si Jane Foster alcontrara’l martiellu de Thor?” xuégase cola continuidá del Universu Marvel, faciendo un cambiu que bien pue ser pequeñu, pero que trai otros detrás nun efectu dominó. Asina, al adaptalo a serie d’e televisión’animación ficieron lo mesmo col Universu Cinematográficu Marvel, mostrándonos por casu un mundu nel que la que recibe’l sueru de supersoldáu ye Peggy Carter y non Steve Rogers, o otru nel que’l Doctor Estrañu acaba volviéndose malváu. Bono, tamién los hubo nos que se salieron un poco del tiestu y nun xugaron dafechu llimpio, como l’adaptación de los cómics Marvel Zombies, na que’l puntu de partida foi quiciabes demasiao llocu pa tar baxol rótulu clásicu.
Agora tenemos los títulos de la próxima temporada, y ente ellos hai tanto sorpreses como otres coses que yá teníen anunciaes. Equí la llista:
- ¿Y si Nebula s’uniera a los Nova Corps?
- ¿Y si Peter Quill atacara a los Héroes Más Poderosos de la Tierra?
- ¿Y si Kahhori reformara’l mundu?
- ¿Y si Hela alcontrara los Diez Aniellos?
- ¿Y si Iron Man s’alcontrara col Gran Maestru?
- ¿Y si Happy Hogan salvara les Navidaes?
- ¿Y si la Capitana Carter lluchara escontra’l Pisotiador Hydra?
- ¿Y si los Vengadore s’axuntaren en 1602?
- ¿Y si Estrañu Supremu interviniera?
Asina, podemos ver que, a la contra de lo que suel asoceder na serie de cómics, en televisión quieren repetir universos pa retomar les trames de la temporada anterior allá onde les dexaren. Los episodios quintu, séptimu y novenu partiríen de los mundos yá presentaos na primer temporada. Mientres, episodios como’l segundu y el cuartu trataríen cruces de trames interesantes (el primeru ente los Guardes de la Galaxa y los Vengadores, el segundu ente Thor y Shang-Chi). Y, per otru llau, sabemos que’l tercer episodiu va presentar una superheroína nueva que nun esiste nos cómics, entendemos que’l sestu ye un especial de Navidaes, y el octavu sedría una adaptación de los cómics de Neil Gaiman 1602, onde los personaxes clásicos de Marvel viven nesa época.
Tamién ye de suponer que, como na temporada anterior, tolos episodios van acabar encaxando pa facer xuntos una trama común, yá que l’apaición del Doctor Estrañu malváu nel últimu pinta a que pelo menos dellos personaxes de los episodios anteriores van tener d’enfrentase a él.
Sicasí, cuasi too son especulaciones que nos vamos faciendo los fans hasta que la temporada s’estrene esti avientu. ¿Ganes?
