Si por casualidá nun oyistis falar de la película, ye probable que quedéis ablucaos con esto, pero allá en 1988 MGM estrenó la qu’agora ye un clásicu de serie B: Killer Clowns from Outer Space. L’argumentu yera un poco’l típicu: una nave espacial aterriza nuna villina de los EE.UU. y los tripulantes monstruosos empiecen a facer de les suyes mientres que les autoridaes nun acaben de creyelo. La diferencia sustancial coles demás películes del estilu ye qu’estos estraterrestres son dafechu, tanto poles traces como poles armes rares qu’usen, payasos. ¡Hasta la nave ye como una carpa de circu! Asina qu’una pareyuca de mozos se ve obligada a salvar a los sos amigos y paisanos, a los que los monstruos tán abduciendo tres envolvelos en ñubes d’algodón de zucre.
Pese al ésitu de la película nunca nun tuvimos segunda parte (esperemos a daquién se-y ocurra) pero por fin va lleganos otru productu de lo que tien potencial pa ser toa una franquicia: ¡un videoxuegu!
El tipu de xuegu va ser multixugador asimétricu, del estilu Dying Light que tanto ta de moda agora pal xéneru d’horror, quiciabes con dalgo más de shooter y combates de lo habitual. Y anque l’estudiu, Teravision Games, ye nuevu y nun tien sacao nada tovía, a la cabeza d’esti ta Randy Greenback, el responsable del xuegu que se fizo col mesmu estilu de Friday the 13th.
Asina, parte de los xugadores (exautamente trés d’ellos) van ser payasos, y los demás posibles víctimes d’estos. Anque pa defendese d’ellos van tener armes y recursos colos que planta-yos cara o la posibilidá de fuxir, anque nuna desigualdá de condiciones bultable.
El xuegu va salir pronto pa PC, PlayStation y Xbox (anque se ñeguen a dar una fecha exauta). Dexámosvos l’avance acabante salir del fornu calcando equí, y por si vos llama la película dexámosvos tamién l’avance d’esta equí.
