El próximu 19 d’abril Netflix va estrenar un episodiu especial pol trentenu aniversariu de la mítica serie, Power Rangers: Once & Always, onde gran parte del elencu de Mighty Morphin’ Power Rangers va volver a interpretar los sos míticos papeles.
Ente los actores confirmaos, los Rangers Azul y Prietu orixinales, Bill y Zack, interpretaos por David Yost y Walter E. Jones, asina como los primeros sustitutos de los Power Rangers Coloráu, Prietu, Mariella y Rosa, cuando la serie siguió ensin los actores del escomienzu, y la que foi la voz de la malvada Rita Repulsa. Tamién va salir l’actriz Charlie Kersh faciendo’l papel de Minh Kwan, fía y heredera de la Ranger Mariella orixinal (interpretada por Thuy Trang y finada en 2001 nun accidente de coche). Ta confirmao, por embargu, que nun va salir Amy Jo Johnson, la Ranger Rosa orixinal, pos la productora nun foi a llegar a un alcuerdu con ella, pero tovía nun se sabe si van tener cameos Jason Lee Scott (el primer Ranger Coloráu, y apocayá con graves problemes llegales) o Jason David Frank, el míticu y primer Ranger Verde y Blancu (acabante finar, pero dempués de que se rodara l’episodiu especial).
Mighty Morphin’ Power Rangers foi una adautación al mercáu americanu de les series xaponeses Super Sentai, usando les sos escenes d’efeutos especiales, superhéroes amazcaraos, monstruos y robós xigantes, pero cambiando’l guión y les escenes más cotidianes poles d’actores norteamericanos. Tuvo un gran ésitu, con dos películes orixinales estrenaes en cines, y tiénenlo tamién les sos socesores, pos hasta anguaño sigue adautándose la franquicia y, dacuando, dalgún de los actores orixinales apaez como convidáu especial nes series nueves.
Yá esiste un avance de lo que nos espera nel capítulu especial nel que los héroes han volver a lluchar escontra’l mal, anque ye una grabación de tres les cámares. Si quies, pues velu calcando equí.
