Allá en 1990, Warner quixo dar una vuelta de tuerca a los sos dibuxos clásicos, presentando una versión nueva pa coneutar coles xeneraciones más moces. El resultáu foi Tiny Toon Adventures, serie protagonizada por unos personaxes que, masque recordaben abondo a versiones infantiles de los clásicos como Bugs Bunny, Daffy Duck (Pato Lucas), Porky o Taz, en verdá yeren otros nuevos, y los vieyos facíen cameos en dalgún episodiu o inclusive yeren los sos profesores. L’ésitu foi mui notable, siendo personaxes reconocibles por tolos millennials, y salieron cuasi una ventena de videoxuegos derivaos.
Por embargu, la cosa cayó nel olvidu, y cuando Warner volvió a los sos “toons” foi siempre a los orixinales. Pelo menos hasta agora. Y ye que tán a puntu d’estrenar una serie nueva, na que los tiny toons yá crecieron suficiente como pa dir a la universidá. El nueve de setiembre estrénase, asina, Tiny Toons: Looniversity, nun movimientu que nun tenemos claro si quier enganchar a los guaḥes o a los padres señardosos. Lo más seguro ye qu’a dambos.
Dexámosvos l’avance de la serie (calcando equí) y l’abertura de la mesma (equí), que como podéis ver ye un homenaxe a l’antigua. También ye evidente que nun cambia namás la edá los personaxes, sinón que tamién l’estilu d’animación, que ye muncho más propiu d’estos tiempos, y inclusive los temes a tratar (ente les escenes podemos ver a Sweetie-Pie, la versión moza y rosada de Piolín, valtando un monumentu al patriarcáu), anque tamién dexen claro que van siguir grandes clásicos, como los golpes con xunque cayíu del cielu.
